یوگی کے شہر گورکھپور جائیں گی پرینکا گاندھی، 14-13 مارچ کا مکمل منصوبہ تیار

کانگریس لیڈروں نے بتایا کہ پرینکا گاندھی بلاک صدور کے ٹریننگ کیمپ میں شامل ہوں گی اور اس دوران نظریاتی سطح پرکانگریس لیڈروں کو مضبوط بنانے کے ساتھ ساتھ کانگریس کی تاریخ بھی ان کے سامنے رکھیں گی۔

کانگریس جنرل سکریٹری پرینکا گاندھی
کانگریس جنرل سکریٹری پرینکا گاندھی
user

قومی آوازبیورو

کانگریس نے اتر پردیش کے وزیر اعلیٰ یوگی آدتیہ ناتھ کے شہر گورکھپور میں 14-13 مارچ کو 11 اضلاع کے 155 بلاک صدور کا دو روزہ تربیتی کیمپ منعقد کیا ہے۔ اس کیمپ میں کانگریس جنرل سکریٹری پرینکا گاندھی بھی شامل ہوں گی اور پارٹی کارکنان و لیڈران کو کامیابی کا منتر بتائیں گی۔

اس کیمپ میں یو پی کانگریس سربراہ اجے کمار للو بھی حصہ لیں گے۔ اجے کمار للو نے کہا کہ ’’یہ تنظیمی سطح پر پارٹی کو مضبوط کرنے کی ایک کوشش ہے۔ کانگریس 2022 اسمبلی انتخابات سے پہلے دیہی علاقوں کے لوگوں سے جڑنے کے لیے لگاتار کوشش کر رہی ہے۔ سابق وزیر اعظم آنجہانی راجیو گاندھی بھی گرام پنچایتوں کو مضبوط بنانے میں یقین کرتے تھے۔‘‘


اس درمیان ریاستی کانگریس جنرل سکریٹری وشو وجے سنگھ نے کہا کہ میٹنگ میں وارانسی، اعظم گڑھ، مئو، بلیا، دیوریا، گورکھپور، کشی نگر، مہاراج گنج، سنت کبیر نگر، سدھارتھ نگر اور بستی ضلعوں کے سربراہان شامل ہوں گے۔ اس کیمپ کے دوران سبھی بلاک صدور موجود رہیں گے اور ساتھ ہی نظریاتی سطح پر کانگریس لیڈروں کو مضبوط بنانے کے ساتھ ساتھ کانگریس کی تاریخ، قوم کی تعمیر میں پارٹی کے کردار، پارٹی سے سبھی وزرائے اعظم کے کام پر بھی تبادلہ خیال ہوگا۔

واضح رہے کہ کانگریس نے گزشتہ سال دسمبر میں زمینی سطح پر انتخابی منصوبہ پر عمل شروع کیا تھا، جس کے عمل درآمد پر پرینکا گاندھی کے ذریعہ سخت نگرانی کی جا رہی ہے۔ داخلی ذرائع نے بتایا کہ نئے پنچایت عہدیداروں کی تقرری کے ساتھ شروع ہوا یہ عمل اب گرام قیادت کی تقرری کے مرحلہ میں ہے۔ وہیں موجودہ کسان تحریک نے پارٹی کو بی جے پی کے خلاف متبادل کی شکل میں خود کو پیش کرنے کا موقع دیا ہے۔ ایسے میں ریاست میں پرینکا گاندھی کی ہلچل بڑھ گئی ہے جب کہ ریاستی صدر اجے کمار للو گزشتہ چار مہینوں سے گاؤوں کا دورہ کر رہے ہیں۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔