اتر پردیش: پرینکا گاندھی نے ضرورت مندوں کے لیے بھجوایا راشن، منگل کو ہوگا تقسیم

لکھنؤ: کانگریس جنرل سکریٹر ی پرینکا گاندھی واڈرا نے لکھنؤ کے ضرورت مندوں کے لئے راشن بھجوایا ہے۔ جسے منگل کو بابا صاحب بھیم راؤ امبیڈکر کی جینتی پر تقسیم کیا جائےگا۔وہیں کانگریس صدر اجے کمار للو نے ریاستی حکومت پر لاک ڈاؤن کے درمیان بے سہارا و ضرورت مندوں کی حاجت روائی میں لگے کارکنوں کوہراسان کرنے اور انکے خلاف ایف آئی آر درج کرنے کا الزام لگایا ہے۔

یوپی کانگریس کے صدر اجے کمار للو نے پیر کو جاری بیان میں بتایا کہ محترمہ واڈرا نے لکھنؤ کے بے سہارا و ضرورت مند افراد کے لئے راشن سے بھرا ٹرک ربھیجا ہے۔تاکہ ان کی مدد کی جاسکے۔انہوں نے کہا کہ پارٹی جنرل سکریٹری مسلسل پوری راحت مہم کی نگرانی کررہی ہیں۔ صرف اترپردیش میں ہی نہیں بلکہ پورے ملک میں جہاں شہری دقتوں کا سامنا کررہے ہیں ان کی مد د کی جارہی ہے۔

ریاستی صدر نے کہا کہ لکھنؤ سمیت پوری ریاست میں کئی جگہ کمیونٹی کچن کا انتظام کیا گیا ہے۔ جہاں پر راشن کی ضرورت ہے ہم لوگ راشن پہنچا رہے ہیں۔ پوری ریاست میں پارٹی کے کارکنان جی جان لگا کر ضرورت مندوں کی حاجت روائی کررہے ہیں۔

ایک دیگر بیان میں اجے کمار للو نے ریاستی حکومت پر کانگریس کارکنوں کو ہراساں کرنے اور ان کے خلاف غلط طریقے سے مقدمہ درج کرنے کا الزام لگاتے ہوئے وزیر اعلی سے مطالبہ کیا کہ اس ضمن میں خصوصی دھیان دیتے ہوئے خاطی افسران کے خلاف کاروائی کی جائے۔ کانگریس لیڈر نے کہا کہ ریلیف کاموں میں مشغول ریاستی سکریٹری سچن چودھری کو 11اپریل کو پولیس نے جیل بھیج دیا جبکہ تین اپریل کو گورکھپور میں جگدیش چوکی کے سپاہیوں نے ضلع صدر نرملا پاسوان کی گاڑی کی ہوا نکلا کر انہیں ہراساں کیا۔ انہوں نے مزید کہا کہ 10اپریل کو بلیا شہر کوتوال وپن سنگھ نے ضلع کانگریس دفتر پہنچ کر وہاں چل رہے کمیونٹی کچن کو بند کرا دیا اور پارٹی ذمہ داروں کے ساتھ بدسلوکی کی۔ وہیں اسی روز چندولی کے مغل سرائے صدر کوتوال گوپال داس گپتا نے کانگریس شہر صدر کی گاڑی کا چالا ن کردیا جبکہ اگلے دن مغل سرائے تھانہ انچارج شیوانند مشر نے پارٹی کارکن دشرتھ چوہان کو بے وجہ تھانے میں بٹھا کر انہیں ہراساں کیا۔

اجے کمار للو نے کہا کہ نو اپریل کو مئو میں ایک کانگریس کارکن کی موت ہونے پر وشنو پرکاش کشوہاکو ان کے آخری رسوم کی ادائیگی میں شرکت کے لئے پا س نہیں دیا گیا جبکہ کہ اناج تقسیم کرنے سے بھی کانگریس کارکنوں کو روکا جارہا ہے۔