فون ریکارڈ نے کھولا 5 ماہ کے بچے کے قتل کا راز، خاتون اور اس کی ہم جنس پرست گرفتار

 تمل ناڈو کے کرشنا گری ضلع کے کیلا منگلم علاقے میں ایک دل دہلا دینے والا واقعہ سامنے آیا ہے جس میں ایک 38 سالہ شخص نے الزام لگایا ہے کہ اس کی بیوی اور اس کی مبینہ ہم جنس پرست ساتھی نے اس کے 5 ماہ کے بیٹے کا گلا دبا کر قتل کردیا۔ معاملہ سامنے آنے کے بعد پولیس نے دونوں خواتین کو گرفتارکرلیا اور تفتیش جاری ہے۔

خبروں کے مطابق چناٹی گاوں کا رہنے والا سریش مزدوری کرتا ہے۔ اس کی شادی 26 سالہ بھارتی سے ہوئی تھی۔ اس جوڑے کی دو بیٹیاں (5 اور 4 سال کی) ہیں اور 5 ماہ قبل ایک بیٹے کی پیدائش ہوئی تھی۔ انہوں نے بتایا کہ 5 نومبر کو مجھے بتایا گیا کہ بچہ اچانک بے ہوش ہو گیا۔ اسے کیلا منگلم واقع سرکاری اسپتال لے جایا گیا، جہاں ڈاکٹروں نے جانچ کے بعد اسے مردہ قراردے دیا۔ بعد میں اہل خانہ نے بچے کی آخری رسومات ادا کر دیں۔

اس واقعے کے کچھ دنوں بعد سریش کو اپنی بیوی پر شک ہوا۔ اس نے بھارتی کا فون چیک کیا جس میں مبینہ طور سے تصاویر، چیٹس اور وائس میسیج ملے۔ اس کے بعد اس نے فوراً کیلا منگلم پولیس کو اس کی اطلاع دی۔ پولیس ذرائع کے مطابق بھارتی کے سمترا نامی خاتون کے ساتھ گزشتہ تین سالوں سے تعلقات تھے۔ ان کے تیسرے بچے کی پیدائش کے بعد دونوں کے درمیان ملاقاتیں کم ہو گئیں، جس سے تعلقات میں کشیدگی پیدا ہوگئی۔ اسی کشیدگی کی وجہ سے بھارتی پر الزام ہے کہ اس نے اپنے 5 ماہ کے بیٹے کا گلا دبا کر قتل کردیا۔

سریش نے پولیس کو فون پر ہونے والی بات چیت کی ریکارڈنگ بھی سونپ دی ہے۔ اس کے مطابق بھارتی نے اس کال میں بچے کو قتل کرنے کا اعتراف کیا ہے۔ شکایت اور ڈیجیٹل ثبوت کی بنیاد پر پولیس نے بھارتی اور اس کی مبینہ ساتھی سمترا کو گرفتار کر لیا ہے۔ پولیس کا کہنا ہے کہ معاملے کی مزید تفتیش جاری ہے۔