پٹرول کی قیمتوں میں اضافہ جاری، دہلی میں پٹرول 82.72 روپے فی لیٹر

پٹرول اور ڈیزل کی قیمتیں رکنے کا نام ہی نہیں لے رہی ہیں ، آج ایک مرتبہ پھر ڈیزل اور پٹرول کی قیمتوں میں اضافہ ہوا ہے ۔ دہلی میں پٹرول اور ڈیزل کے داموں میں 8 پیسہ کا اضافہ ہوا ہے ۔ اس کے ساتھ ہی دہلی میں ڈیزل کی قیمت 75.46 روپے فی لیٹر پہنچ گئی ہے، جبکہ پٹرول کی قیمت82.72 روپے پہنچ گئی ہے۔ وہیں ممبئی میں پٹرول اور ڈیزل کی قیمتوں میں 9 پیسے کا اضافہ ہوا ہے جس کے بعد ممبئی میں پٹرول کی قیمت88.18 روپے فی لیٹر ہو گئی ہے اور ڈیزل کی قیمت79.11روپے فی لیٹر ہو گئی ہے۔

واضح رہے اتوار کو یعنی کل دہلی میں پٹرول کی قیمتوں میں6 پیسہ کا اضافہ ہوا تھا اور ڈیزل کی قیمتوں میں19 پیسوں کا اضافہ ہوا تھا۔

پٹرول ڈیزل میں ہو رہے اضافہ پر کانگریس ترجما ن رندیپ سنگھ سرجے والا نے کہا ہے کہ’’دس روز کے اندر ہی مودی حکومت نے پٹرول اور ڈیزل پر اپنی جملہ سے بھری راحت واپس لے لی ہے ۔1.51روپے کی معمولی راحت کے بعد (دہلی میں ) پٹرول کی قیمتیں1.22 پیسے بڑھیں اور ڈیزل کے دام2.51 پیسے بڑھے ۔اسے کہتے ہیں رول بیک کا رول بیک ۔مودی جی کا چھل ،جنتا پر بوجھ ، ہر پل‘‘۔

پٹرول اور ڈیزل کی بڑھتی قیمتوں کے پیش نظر آج وزیر اعظم نریندر مودی تیل کمپنیوں کے سربراہوں کے ساتھ میٹنگ کریں گے اور تیل کے معاملوں سے جڑے تمام پہلوؤں پر غور کیا جائے گا۔