8 مارچ کو پرینکا گاندھی کی قیادت میں خواتین کریں گی مارچ

پارٹی کی ترجمان سپریہ شرینیت نے کہا کہ ’لڑکی ہوں لڑ سکتی ہوں‘ کانگریس کے لیے صرف ایک انتخابی نعرہ نہیں ہے، بلکہ ملک میں خواتین کو مضبوط اور بااختیار بنانے کے لیے ایک تحریک شروع کی گئی ہے۔

تصویر ٹوئٹر@INCUttarPradesh
تصویر ٹوئٹر@INCUttarPradesh
user

یو این آئی

لکھنؤ: ’ناری شکتی‘ (قوتِ نسواں) کی بدولت اتر پردیش میں سیاست کی تصویر بدلنے کا دعویٰ کرنے والی کانگریس جنرل سکریٹری پرینکا گاندھی واڈرا 8 مارچ کو عالمی یوم خواتین کے موقع پر لکھنؤ میں پیدل مارچ کریں گی، پارٹی کی ترجمان سپریہ شرینیت نے اتوار کو صحافیوں کو بتایا کہ 8 مارچ کو پارٹی کی جنرل سکریٹری پرینکا گاندھی کی قیادت میں خواتین کے مارچ کا انعقاد کیا جائے گا، اس پروگرام کا مقصد خواتین اور ان کی خواہشات کو ہندوستانی سیاست کے مرکزی دھارے میں لانا ہے۔

انہوں نے کہا کہ سیاست کے میدان میں ’مہیلا جن جاگرن‘ کا آغاز اتر پردیش اسمبلی انتخابات کے ذریعے کیا جا چکا ہے جس میں کانگریس نے خواتین امیدواروں کو 40 فیصد ٹکٹ دینے کا وعدہ پورا کیا۔ اس مہم میں ملک بھر سے کانگریس پارٹی کی منتخب خواتین نمائندے حصہ لیں گی۔ دن میں 12 بجے شروع ہونے والا یہ مارچ بیگم حضرت محل چوک سے اوڈا دیوی چوراہے تک، وہاں سے ہوتے ہوئے جی پی او واقع گاندھی جی کے مجسمے کے پاس ختم ہوگا۔


شرینیٹ نے کہا کہ ’لڑکی ہوں لڑ سکتی ہوں‘ کانگریس کے لیے صرف ایک انتخابی نعرہ نہیں ہے، بلکہ ملک میں خواتین کو مضبوط اور بااختیار بنانے کے لیے ایک تحریک شروع کی گئی ہے۔ خواتین کا یہ مارچ یکجہتی کا پیغام دینے اور سیاست کو مزید جامع بنانے کے ساتھ ساتھ سیاست میں خواتین کی شرکت کی علامت ہے۔ خواتین کی سیاسی بحالی کو کوئی طاقت نہیں روک سکتی۔ اس مارچ میں ڈاکٹروں، سیوِکاؤں (سروس کرنے والی)، اساتذہ کے ساتھ ساتھ کھیل اور فلمی دنیا سے وابستہ خواتین کے علاوہ کانگریس کی خواتین عہدیدار اور کارکنان شامل ہوں گی۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔