راہل اور پرینکا نے راجیو گاندھی کو یاد کرتے ہوئے شیئر کیا جذباتی پیغام

کانگریس صدر راہل گاندھی اور کانگریس جنرل سکریٹری پرینکا گاندھی نے اپنے والد اور سابق وزیر اعظم راجیو گاندھی کو ان کے یوم شہادت پر خراج عقیدت پیش کرتے ہوئے سوشل میڈیا پر پیغام شیئر کیا ہے۔ اپنے والد کی 28ویں برسی پر راہل گاندھی نے ٹوئٹ کرتے ہوئے لکھا کہ ’’میرے والد ایک شریف النفس، ہمدرد اور سبھی سے محبت کرنے والے شخص تھے۔ انھوں نے مجھے سبھی سے محبت کرنے اور سب کی عزت کرنا سکھایا۔ انھوں نے مجھے ہمیشہ دوسروں کو معاف کرنا اور کبھی نفرت نہ کرنا سکھایا۔ میں انھیں بہت یاد کرتا ہوں۔ ان کی برسی کے موقع پر میں انھیں محبت اور عاجزی کے ساتھ یاد کرتا ہوں۔‘‘

کانگریس جنرل سکریٹری پرینکا گاندھی نے اپنے ٹوئٹر ہینڈل سے راجیو گاندھی کے ساتھ کھنچوائی گئی بچپن کی ایک تصویر شیئر کی ہے اور ساتھ میں ہری ونش رائے بچن کی ایک نظم بھی لکھی ہے۔ تصویر کے ساتھ پرینکا نے لکھا ہے ’’آپ ہمیشہ میرے ہیرو رہیں گے۔‘‘

اس سے قبل منگل کی صبح راجیو گاندھی کے یوم شہادت کے ومقع پر راج گھاٹ واقع ان کی سمادھی ’ویر بھومی‘ پر سونیا، راہل اور پرینکا گاندھی کے علاوہ سابق وزیر اعظم منموہن سنگھ، سابق صدر پرنب مکھرجی اور سابق نائب صدر حامد انصاری نے گلپوشی کر انھیں خراج عقیدت پیش کی۔

واضح رہے کہ 21 مئی 1991 کا وہ سیاہ دن جب ایل ٹی ٹی ای کے شورش پسندوں نے سابق وزیر اعظم راجیو گاندھی کا قتل کیا تھا، اس واقعہ نے پورے ملک کو جھنجھوڑ کر رکھ دیا تھا۔ تمل ناڈو کے کچھ تشدد پسندوں نے شری پیرمبدور میں راجیو گاندھی پر خودکش حملہ کیا تھا۔ 1991 عام انتخابات کی تشہیر کے دوران ایک خاتون راجیو گاندھی کے پاس پھولوں کا ہار لے کر پہنچی اور ان کے بہت قریب جا کر جیسے ہی ان کے پیر چھونے کو جھکی، تبھی اس خاتون نے خود کو بم سے اڑا لیا۔ اس واقعہ میں راجیو گاندھی کے علاوہ کئی لوگوں نے اپنی جان گنوائی تھی۔