ڈووال کا فون ٹیپ کرنے والے افسر کی سی بی آئی سے چھٹی

سی بی آئی مستقل تنازعات کا شکار ہے اور کل اس میں آپریشن کلین چلایا گیا جس میں سی بی آئی کے اسپیشل ڈائریکٹر راکیش استھانہ سمیت چار افسران کو سی بی آئی سے ٹرانسفر کر دیا گیا ۔ جن افسران کا کل ٹرانسفر کیا گیا ہے اس میں منیش سنہا کا نام بھی ہے اور منیش سنہا وہ ڈی آئی جی ہیں جن کی سپریم کورٹ میں داخل عرضی کی بنیاد پر قومی سلامتی مشیر (این ایس اے) اجیت ڈووال کے فون ٹیپ کرنے کا معاملہ اٹھا تھا ۔ اس کا سیدھا مطلب یہی ہے کہ ڈووال کا فون ٹیپ کرانے والے افسر کی سی بی آئی سے چھٹی ہو گئی ہے۔ واضح رہے کہ پہلے سپریم کورٹ نے سی بی آئی ڈائریکٹر آلوک ورما کو ان کے عہدے پر بحال کیا تھا اور اس کے بعد ڈائریکٹر کا انتخاب کرنے والی سلیکٹ کمیٹی نے آلوک ورما کا سی بی آئی سے ٹرانسفر کر دیا تھا ۔ وزیر اعظم اس سلیکٹ کمٹیی کی صدارت کرتے ہیں۔

سی بی آئی میں کل چار افسران کے تعلق سے حکم جاری ہوا تھا جن میں راکیش استھانہ، اے کے شرما اور منیش سنہا سی بی آئی میں نمبر ایک اور دو کے جھگڑے کی وجہ سے سرخیوں میں آئے تھے جبکہ چوتھے افسر ایس پی جینت ہیں جنہوں نے خود کو سی بی آئی سے باہر جانے کی خواہش ظاہر کی تھی۔ ان تینوں افسران کی ملازمت کا ابھی کافی وقت باقی ہے ۔ سی بی آئی کے اگلے ڈائریکٹر کی تقرری کے لئے سلیکٹ کمیٹی کی آئندہ ہفتہ میٹنگ ہونی ہے۔