بہار کے میونسپل کارپوریشنز کو ملا نیا میئر، پٹنہ کی کرسی پر سیتا ساہو کا قبضہ برقرار، ریشمی بنی ڈپٹی میئر

بہار میونسپل کارپوریشن انتخاب 2022 کے تحت 17 میونسپل کارپوریشنز اور 68 بلدیوں میں ہوئے انتخابات کے نتائج آج برآمد ہو گئے۔ ان میں پٹنہ میونسپل کارپوریشن کے میئر عہدہ پر ایک بار پھر سیتا ساہو نے قبضہ برقرار رکھا ہے، جبکہ ڈپٹی میئر عہدہ پر ریشمی چندرونشی نے جیت حاصل کی ہے۔

بہار میونسپل کارپوریشن انتخاب کے دوسرے مرحلہ میں 28 دسمبر کو ہوئی ووٹنگ میں کئی میونسپل کارپوریشنز میں کانٹے کی ٹکر دیکھنے کو ملی۔ اس مرحلہ میں 11 ہزار سے زیادہ امیدواروں کا وقار داؤ پر لگا تھا۔ جمعہ کو پولنگ مراکز پر صبح سے ہی امیدواروں کے حامیوں کی بھیڑ لگی ہوئی تھی۔

پٹنہ میں میئر کی کرسی پر سیتا ساہو نے ایک بار پھر سے قبضہ جما لیا ہے۔ ساہو نے زبردست مقابلے میں مہہ جبیں کو تقریباً 18 ہزار ووٹوں سے شکست دی۔ دوسری طرف ڈپٹی میئر عہدہ پر ریشمی چندرونشی نے انجنا گاندھی کو انتخاب میں شکست دی ہے۔ ریشمی چندرونشی نے اس انتخاب میں 5 ہزار سے زیادہ ووٹ سے جیت درج کی ہے۔

گیا سے میئر عہدہ پر گنیش پاسوان نے بازی ماری ہے، جبکہ ڈپٹی میئر عہدہ پر چنتا دیوی نے جیت حاصل کی۔ اسی طرح آرہ میونسپل کارپوریشن میں میئر عہدہ پر اندو دیوی نے قبضہ جمایا اور ڈپٹی میئر کی سیٹ پورن دیوی کو ملی ہے۔ بھاگلپور سے میئر وسندھرا لال منتخب ہوئی ہیں اور ڈپٹی میئر عہدہ پر صلاح الدین نے جیت درج کی۔

سمستی پور میں میئر کی شکل میں انیتا رام اور ڈپٹی میئر عہدہ کے لیے رام بالک پاسوان، دربھنگہ سے میئر عہدہ پر انجم آرا اور ڈپٹی میئر عہدہ پر نازیہ حسن کامیاب رہیں۔ اسی طرح مظفر پور کی میئر انیتا دیوی منتخب ہوئی ہیں اور ڈپٹی مہئر عہدہ پر مونالیسا نے قبضہ کیا ہے۔

واضح رہے کہ بہار میں اس بار پہلی مرتبہ میئر اور ڈپٹی میئر کا انتخاب براہ راست عوام نے ووٹ کی طاقت سے کیا ہے۔ اس سے قبل وارڈ کونسلر کے ووٹ سے میئر اور ڈپٹی میئر کا انتخاب ہوتا تھا۔