'مودی کنیت' کیس: راہل گاندھی کو پٹنہ ہائی کورٹ سے راحت، ایم پی-ایم ایل اے عدالت کے حکم پر لگائی روک!
راہل گاندھی کی جانب سے پٹنہ ہائی کورٹ میں اس کے لیے استثنیٰ کی اپیل کی گئی تھی۔ پٹنہ ہائی کورٹ نے ایم پی-ایم ایل اے کورٹ کے حکم پر روک لگاتے ہوئے 15 مئی کی تاریخ دی ہے۔
کانگریس لیڈر راہل گاندھی کو پٹنہ ہائی کورٹ سے بڑی راحت ملی ہے۔ مودی کنیت کیس میں پٹنہ کی ایم پی-ایم ایل اے عدالت نے راہل گاندھی کو منگل 25 اپریل کو جسمانی طور پر پیش ہونے کا حکم دیا تھا۔ راہل گاندھی کی جانب سے پٹنہ ہائی کورٹ میں اس کے لیے استثنیٰ کی اپیل کی گئی تھی۔ پٹنہ ہائی کورٹ نے ایم پی- ایم ایل اے کورٹ کے حکم پر روک لگاتے ہوئے 15 مئی کی تاریخ دی ہے۔
پیر کو اس معاملے کی سماعت کرتے ہوئے پٹنہ ہائی کورٹ کے جسٹس سندیپ کمار کی سنگل بنچ نے کیس کی اگلی سماعت 15 مئی کو مقرر کی ہے۔ پٹنہ کی ایم پی-ایم ایل اے عدالت نے راہل گاندھی کو مودی کنیت کے حوالے سے دیئے گئے بیان پر 25 اپریل کو عدالت میں حاضر ہونے کی ہدایت دی تھی۔ ہائی کورٹ کے حکم امتناعی کے بعد اب انہیں 25 اپریل کو ایم پی-ایم ایل اے کورٹ میں پیش نہیں ہونا پڑے گا۔
بتا دیں کہ راہل گاندھی کو سورت کی ایک عدالت نے مودی کنیت کیس میں ہتک عزت کے چار سال پرانے معاملے میں دو سال کی سزا سنائی تھی۔ عدالت کے اس فیصلے کے بعد سکریٹریٹ نے ان کی پارلیمنٹ کی رکنیت بھی منسوخ کر دی تھی۔ قابل ذکر بات یہ ہے کہ 2019 کے لوک سبھا انتخابات کے دوران راہل گاندھی نے کرناٹک کے کولار میں ایک تقریر کی تھی جس میں انہوں نے مودی کنیت کے حوالے سے بیان دیا تھا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔