مایاوتی نے بی جے پی کی شان میں قصیدے پڑھے، جس نے دلتوں پر مظالم کرنے والوں کی پشت پناہی کی: کانگریس
مایاوتی نے بی ایس پی کی بی جے پی اور آر ایس ایس کے ساتھ حمایت کی پالیسی واضح کی، جس پر کانگریس نے شدید تنقید کرتے ہوئے کہا کہ دلت اور محروم طبقات کا حق صرف ان کے اتحاد میں محفوظ ہے
لکھنؤ: اتر پردیش کانگریس نے جمعرات کو وزیر اعلی یوگی آدتیہ ناتھ کی تعریف کرنے پر بہوجن سماج پارٹی (بی ایس پی) سپریمو مایاوتی پر نشانہ سادھتے ہوئے کہا کہ انہوں نے آخر کار آئین کو بدلنے کی منشا رکھنے والی بی جے پی اور منوادی نظریہ کی حامل آر ایس ایس کو حمایت دینے کی پالیسی صاف طور پر واضح کر دی ہے۔
پارٹی کے ریاستی ترجمان انشو اوستھی نے ایک بیان میں کہا، ’’ہم بہن مایاوتی کا شکریہ ادا کرتے ہیں۔ جنہوں نے آج بہوجن سماج پارٹی (بی ایس پی) کی آئین بدلنے کی منشا رکھنے والی بی جے پی اور منوادی آر ایس ایس کو حمایت دینے والی پالیسی صاف طور پر واضح کر دی ہے۔‘‘
انہوں نے کہا کہ بی ایس پی کی بی جے پی کی حمایت والی پالیسی پر اتر پردیش کے بہوجن سماج کے لوگوں کو پہلے سے ہی شبہ تھا اسے آج مایاوتی نے بی جے پی حکومت اور وزیر اعلی یوگی آدتیہ ناتھ کی تعریف کر کے صاف کر دیا ہے۔ اوستھی نے کہا کہ بہوجن سماج پارٹی کبھی کانشی رام کے مشن دلت اور محروم طبقات کی لڑائی کے لئے جانی جاتی تھی۔ آج بی جے پی کے قصیدے پڑھ رہی ہے۔
انہوں نے کہا کہ بی ایس پی آج اس کانگریس پارٹی، راہل گاندھی اور اپوزیشن لیڈروں سے سوال کر رہی ہے جن کے لیڈروں نے ان 10 سالوں میں اس ملک کے دلت، پچھڑوں، استحصال زدہ طبقات اور محرومین کے حق اور حقوق بچانے، بابا صاحب کے بنائے آئین کو بچانے کی لڑائی لڑی، چاہئے ہاتھرس کا واقعہ ہو، لکھیم پور، رائے بریلی، اعظم گڑھ، امبھا سمیت پوری ریاست میں جہاں دلتوں ، خواتین پر مظالم ہوئے ہر جگہ راہل گاندھی، پرینکا گاندھی اور کانگریس کے لیڈروں نے پہنچ کر متاثرین کے انصاف کے لئے لڑائی لڑی لیکن بی ایس پی کہیں نکلی نہیں اور آج مایاوتی اسی بی جے پی اور یوگی آدتیہ ناتھ حکومت کی تعریف کر رہی ہیں جو دلتوں پر مظالم کرنے والے مجرمین کا تحفظ کر رہی تھی۔
ریاستی ترجمان نے کہا کہ آج ریاست کے دلت اور محروم طبقات مایاوتی نے سوال کر رہے ہیں کہ آخر ایسی کیا مجبوری ہے کہ بی ایس پی آئین بدلنے والوں کے ساتھ کھڑی ہے۔ اب ریاست کے دلت، استحصال زدہ طبقات، محروم سماج کو سمجھ میں آ گیا ہے کہ ان کے حقوق اور بابا صاحب کا بنایا آئین کانگریس اور انڈیا اتحاد میں ہی محفوظ ہے۔ انہوں نے کہا، ’’بہوجن سماج پارٹی اب وہ بہوجن سماج پارٹی نہیں رہی۔ سال 2027 میں ریاست کا بہوجن سماج انڈیا اتحاد کی حکومت بنائے گا۔‘‘
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔