مدھیہ پردیش: ٹرانسپورٹ گھوٹالے پر کانگریس کا اسمبلی میں ہنگامہ، سی بی آئی جانچ کا مطالبہ

بھوپال: مدھیہ پردیش میں ٹرانسپورٹ گھوٹالہ سیاسی ہنگامے کا سبب بن گیا ہے۔ کانگریس نے اس معاملے کو اسمبلی میں اٹھایا اور سی بی آئی سے جانچ کا مطالبہ کرتے ہوئے حکومت کو کٹہرے میں کھڑا کیا۔ اپوزیشن نے حکومت پر سابق وزیروں کو تحفظ دینے کا الزام عائد کیا اور اسمبلی سے واک آؤٹ کر دیا۔

اپوزیشن لیڈر امنگ سنگھار نے کہا کہ اس معاملے کی جانچ پہلے سے تین ایجنسیوں – لوکایکت، ای ڈی اور انکم ٹیکس ڈیپارٹمنٹ کر رہے ہیں، اس کے باوجود حکومت سی بی آئی کو معاملہ کیوں نہیں سونپ رہی؟ انہوں نے الزام عائد کیا کہ سابق پولیس اہلکار سوربھ شرما کی گرفتاری کے بعد سونے کی اینٹیں، 10 کروڑ روپے نقد اور 2.5 کوئنٹل چاندی برآمد ہوئی ہے، جو عوام کا پیسہ ہے۔ انہوں نے سوال اٹھایا کہ حکومت سابق وزیروں کو بچانے کے لیے کیوں کوشاں ہے؟

اس دوران ٹرانسپورٹ وزیر ادے پرتاپ سنگھ نے اسمبلی میں جواب دیتے ہوئے کہا کہ اس معاملے کی جانچ پہلے سے تین ایجنسیوں کے ذریعے ہو رہی ہے اور جب تک ان کی رپورٹ نہیں آ جاتی، سی بی آئی سے الگ جانچ کی ضرورت نہیں ہے۔ انہوں نے کہا کہ حکومت جانچ میں کوئی مداخلت نہیں کر رہی اور رپورٹ آنے کے بعد ہی اگلا قدم اٹھایا جائے گا۔

وزیر نے سابق پولیس اہلکار سوربھ شرما کی تقرری پر اٹھے سوالات کا جواب دیتے ہوئے کہا کہ ان کی تعیناتی کلکٹر کی سفارش پر ہوئی تھی، جو کہ انکمپنسیشن بنیاد پر تھی۔ انہوں نے کہا کہ تعیناتی کے وقت کسی شخص کے مجرم یا بے ایمانی کا امکان ظاہر نہیں کیا جا سکتا۔ تاہم، جب معاملہ سامنے آیا تو پولیس کو مجرمانہ مقدمہ درج کرنے کے لیے خط لکھا گیا۔

واضح رہے کہ ٹرانسپورٹ گھوٹالے میں پولیس نے سابق اہلکار سوربھ شرما سمیت تین افراد کو گرفتار کیا ہے۔ اس کارروائی میں ایک گاڑی سے 54 کلو سونا، 10 کروڑ روپے نقد اور ایک دفتر سے 2.5 کوئنٹل چاندی برآمد کی گئی۔ جانچ ایجنسیوں کو اس گھوٹالے سے متعلق اہم دستاویزات بھی ملے ہیں۔