نیلگری میں پرچۂ نامزدگی داخل کرنے کے دوران بی جے پی-اے آئی اے ڈی ایم کے کارکنان میں تصادم، پولیس نے کیا لاٹھی چارج

تمل ناڈو کے نیلگری میں پیر کے روز لوک سبھا انتخاب کے لیے پرچۂ نامزدگی کے دوران ضلع کلکٹریٹ کے پاس بی جے پی اور اے آئی اے ڈی ایم کے کارکنان کے درمیان زبردست تصادم ہو گیا، جسے سنبھالنے کے لیے پولیس کو لاٹھی چارج کرنا پڑا۔ بی جے پی نے یہاں سے مرکزی وزیر ایل مروگن کو اتارا ہے۔ اس سیٹ سے ’انڈیا‘ اتحاد کے امیدوار ڈی ایم کے ڈپٹی جنرل سکریٹری اور سابق مرکزی وزیر اے راجہ ہیں۔

بی جے پی امیدوار اور وزیر مملکت برائے ماہی پروری مروگن اور اے آئی اے ڈی ایم کے امیدوار ڈی. لوکیش تمل سیلون جب نامزدگی پرچہ داخل کرنے کے لیے اپنے اپنے حامیوں کے ساتھ کلکٹریٹ پہنچے تو دونوں پارٹیوں کے کارکنان میں تصادم ہو گیا۔ دونوں امیدوار بڑی تعداد میں اپنے حامیوں کے ساتھ یہاں پہنچے تھے جو دیکھتے ہی دیکھتے دونوں طرف سے زبردست نعرے بازی شروع ہو گئی، اور پھر کچھ ہی دیر بعد تصادم والے حالات پیدا ہو گئے۔

اس تصادم میں دونوں فریقین کے کچھ کارکنان زخمی ہو گئے ہیں۔ اس موقع پر تمل ناڈو بی جے پی صدر کے. اناملائی بھی ایل. مروگن کے ساتھ موجود تھے۔ بعد میں انّاملائی نے نیلگری اسپتال کا دورہ کیا جہاں زخمی بی جے پی کارکنان کا علاج چل رہا ہے۔ بہرحال، دونوں لیڈروں نے اپنا اپنا پرچۂ نامزدگی داخل کر دیا ہے۔

انّاملائی نے اسپتال میں میڈیا اہلکاروں سے بات کرتے ہوئے کہا کہ پارٹی تب تک احتجاجی مظاہرہ کرے گی جب تک نیلگری کے پولیس سپرنٹنڈنٹ کو غیر ضروری طور پر لاٹھی چارج کا حکم دینے کے لیے ٹرانسفر نہیں کیا جاتا۔