ایل جی کے معائنے پر دیویندر یادو کا ردعمل، کہا- ’دہلی کی بدحالی کے بی جے پی اور عام آدمی پارٹی دونوں ذمہ دار‘

نئی دہلی: دہلی کے لیفٹیننٹ گورنر (ایل جی) ونے کمار سکسینہ نے حالیہ دنوں دہلی کے مختلف علاقوں کا دورہ کر کے خراب حالات کا جائزہ لیا۔ دہلی کانگریس کے صدر دیویندر یادو نے اس دورے کو سیاسی مقاصد سے جوڑتے ہوئے کہا کہ دہلی کے بدتر حالات کے لیے بی جے پی اور عام آدمی پارٹی دونوں برابر کے ذمہ دار ہیں۔

دیویندر یادو نے کہا کہ دہلی کی عوام کئی سالوں سے گندگی، بجلی اور پانی کی ناقص سپلائی، گندے پانی، ابلتے سیور، اور غیرقانونی کالونیوں میں ناروا زندگی گزارنے پر مجبور ہیں۔ کانگریس گزشتہ کئی سالوں سے اس بدحالی کو اجاگر کرتی آرہی ہے۔

انہوں نے کہا کہ دہلی انصاف یاترا کے دوران 650 کلومیٹر کا سفر کر کے دہلی کی عوام کے مسائل کو قریب سے محسوس کیا۔ انہوں نے عام آدمی پارٹی پر تنقید کرتے ہوئے کہا کہ مفت پانی اور سستی بجلی کے وعدے عوام کے لیے نقصاندہ ثابت ہوئے ہیں، اور بجلی کے بھاری بلوں سے ہر طبقہ پریشان ہے۔

یادو نے الزام لگایا کہ ایل جی کا بی جے پی کے ممبران پارلیمنٹ کے ساتھ دورہ کرنا اور اصل مسائل جیسے خواتین پر مظالم، بڑھتے جرائم، اور ریڑھی پٹری ایکٹ پر کوئی گفتگو نہ کرنا ناقابلِ فہم ہے۔

انہوں نے کہا کہ کانگریس ہمیشہ غریبوں کے حقوق کے لیے آواز اٹھاتی رہی ہے۔ دہلی انصاف یاترا کے دوران ہر طبقے سے ملاقات کے بعد یہ واضح ہوا کہ بی جے پی اور عام آدمی پارٹی کی حکومتوں نے دہلی کو بدحالی کے گڑھے میں دھکیل دیا ہے۔

دیویندر یادو نے کہا کہ جہاں اروند کیجریوال نے دہلی کو لندن بنانے کا وعدہ کیا، وہیں بی جے پی نے جھگی جھونپڑیوں کو مکانات دینے کے وعدے پر عمل نہیں کیا۔ دونوں جماعتیں صرف انتخابات کے وقت غریبوں کو یاد کرتی ہیں۔

انہوں نے کانگریس کی حکومت کے 15 سالہ دور کو یاد کرتے ہوئے کہا کہ اُس وقت دہلی نے تعلیم، صحت، ٹرانسپورٹ، اور دیگر شعبوں میں ترقی کی بلندیوں کو چھوا تھا، لیکن کیجریوال حکومت نے دہلی کے عوام کو مایوسی کے سوا کچھ نہیں دیا۔

یادو نے ایل جی کے حالیہ دورے کو خوش آئند قرار دیتے ہوئے کہا کہ اگر وہ غریبوں کے حقوق کی حمایت کریں گے تو دہلی کی عوام اگلے اسمبلی انتخابات میں بہتر فیصلہ لے سکے گی۔