دہلی: آوارہ گایوں کو پکڑ کر گئوکشی انجام دینے کے الزام میں للت اور شاہجہاں گرفتار

دہلی میں آوارہ گایوں کو پکڑ کر گئوکشی انجام دینے کا ایک معاملہ سامنے آیا ہے۔ بتایا جا رہا ہے کہ للت اور شاہجہاں نامی شخص کو اس تعلق سے دہلی پولیس نے تصادم کے بعد گرفتار کر لیا ہے۔ موصولہ اطلاعات کے مطابق دونوں ڈیری کے نام پر گئوکشی جیسا عمل کرتے تھے تاکہ کسی کو شبہ نہ ہو۔ جب للت اور شاہجہاں کا پولیس سے تصادم ہوا تو اس وقت وہ گئوکشی کی نیت سے گایوں اور اوزاروں کو لے کر سیکٹر-35 روہنی کے پاس جنگل میں پہنچے تھے۔ خبر ملنے کے بعد پہنچی پولیس کو دیکھ کر ملزمین نے فائرنگ شروع کر دی۔ جوابی فائرنگ میں ایک ملزم کے پیر میں گولی لگ گئی، اور پھر دونوں ملزمین کو گرفتار کر لیا گیا۔

اس واقعہ کے تعلق سے پولیس کا کہنا ہے کہ دونوں ملزمین کے پاس سے 6 گائے، بیہوشی کے انجکشن، گئوکشی کے لیے اوزار، ایک پستول، دو زندہ اور دو خالی کارتوس برآمد کیے گئے ہیں۔ پکڑے گئے ملزمین کے نام شاہجہاں (نریلا باشندہ) اور للت (راجیو نگر، بیگم پور باشندہ) ہیں۔ الزام ہے کہ گاؤں میں آوارہ گائے کو دیکھنے پر دونوں اسے پکڑ لیتے تھے، پھر انجکشن لگا کر بیہوش کر دیتے تھے۔ کسی گاڑی سے یہ گائے کو سنسان جگہ پر لے جا کر گئوکشی کا عمل انجام دیتے تھے۔

پولیس پوچھ تاچھ میں پتہ چلا ہے کہ شاہجہاں بنیادی طور پر دربھنگہ (بہار) کا رہنے والا ہے اور تقریباً 20 سال سے دہلی واقع نریلا میں رہ رہا ہے۔ اس نے تقریباً 8 سال قبل ڈیری کھولی اور اس کے نام پر گئوکشی کا عمل شروع کر دیا۔ جہاں تک للت کا معاملہ ہے، وہ باغپت (یوپی) کا رہنے والا ہے اور اس نے بھی ڈیری کھولی تھی۔ کچھ دنوں بعد یہ بھی شاہجہاں کے ساتھ گئوکشی میں شامل ہو گیا تھا۔