کرناٹک حکومت جی ایس ٹی نقصان پر عدالت جائے گی: سدارامیا

کرناٹک کے وزیر اعلیٰ سدارامیا نے جمعہ کو کہا کہ جی ایس ٹی کو آسان بنانے سے ریاست کو 15,000 کروڑ روپے کا تخمینہ نقصان اٹھانا پڑے گا اور وہ مرکزی حکومت سے اس رقم کی وصولی کے لیے قانونی کارروائی کا سہارا لے گی۔

اپنی رہائش گاہ پر میڈیا سے خطاب کرتے ہوئے وزیر اعلیٰ  سدارامیا نے مرکزی حکومت کے اقدام پر تنقید کرتے ہوئے کہا کہ ایسا لگتا ہے کہ یہ آئندہ بہار انتخابات سے متاثر ہے۔ انہوں نے کہا کہ ہم فنڈز کی وصولی کے لیے قانونی کارروائی کا سہارا لیں گے۔انہوں نے مزید کہا کہ 2017 میں طے کی گئی جی ایس ٹی کی شرح گزشتہ آٹھ سالوں میں حد سے زیادہ تھیں۔ انہوں نے سوال کیا، "کیا اب حکومت عوام سے وصول کیے گئے اضافی جی ایس ٹی کو واپس کرے گی؟ جی ایس ٹی کی شرحوں کو ابھی کم کرنا اور ان انتخابی کٹوتیوں کے لیے خود کو مبارکباد دینا مناسب نہیں ہے۔

مرکزی گرانٹس میں تاخیر کا ذکر کرتے ہوئے وزیر اعلیٰ نے کہا کہ تخمینہ 17,000 کروڑ میں سے صرف 3,200 کروڑ ہی کرناٹک کو جاری کیے گئے ہیں۔ انہوں نے اس کا موازنہ اتر پردیش سے کیا، جسے مرکزی فنڈز کا 18 فیصد ملتا ہے، جبکہ کرناٹک کو صرف 3.5 فیصد ملتا ہے۔

وزیر اعلیٰ  نے کہا، "کرناٹک نے مرکز کو ٹیکسوں میں 4.5 لاکھ کروڑ  روپےکا تعاون دیا ہے، پھر بھی ہمیں صرف 14 پیسے فی روپیہ ملتا ہے۔  اگر ضروری ہوا تو قانونی کارروائی کا سہارا لیں گے، جیسا کہ ہم نے پچھلی بار کیا تھا۔"