بدزبان کالی چرن مہاراج کو مل گئی ضمانت، مہاتما گاندھی کے لیے نازیبا الفاظ کا کیا تھا استعمال

چھتیس گڑھ کی راجدھانی رائے پور میں گزشتہ 26-25 دسمبر کو منعقد ایک دھرم سنسد میں کالی چرن مہاراج نے مہاتما گاندھی کے خلاف ہتک آمیز الفاظ کہے تھے۔

کالی چرن مہاراج
کالی چرن مہاراج
user

قومی آوازبیورو

مہاتما گاندھی کے لیے نازیبا الفاظ استعمال کرنے والے اور متنازعہ بیان دینے والے کالی چرن مہاراج کو ضمانت مل گئی ہے۔ کالی چرن کو تین مہینے بعد بلاسپور ہائی کورٹ سے ضمانت ملی ہے۔ جسٹس اروند کمار چندیل کی عدالت نے جمعہ کے روز کالی چرن کو ضمانت دینے کا فیصلہ کیا۔ عدالت نے ایک لاکھ روپے کے بانڈ اور 50 ہزار ڈپازٹ کرنے کی شرط پر انھیں ضمانت دی ہے۔

بلاسپور ہائی کورٹ نے جمعہ کو کالی چرن مہاراج کی ضمانت عرضی پر سماعت کی۔ اس دوران سرکاری وکیل نے ضمانت عرضی کے خلاف کہا کہ ’’ان کو اپنی حرکتوں کا کوئی پچھتاوا نہیں ہے۔ اندیشہ ہے کہ ضمانت ملنے کی حالت میں جیل سے باہر آنے پر وہ فرقہ پرستی پھیلا سکتے ہیں۔‘‘ دوسری طرف کالی چرن کے وکیل نے کہا کہ ’’کتابوں میں لکھی ہوئی باتوں سے متعلق عوامی طور پر بیان دینا کوئی جرم نہیں ہے۔ کالی چرن 90 دنوں سے جیل میں بند ہے، اسے ضمانت کا حق ہے۔‘‘


واضح رہے کہ چھتیس گڑھ کی راجدھانی رائے پور میں گزشتہ 26-25 دسمبر کو منعقد ایک دھرم سنسد میں کالی چرن مہاراج نے مہاتما گاندھی کے خلاف ہتک آمیز الفاظ کہے تھے۔ اس کے بعد کانگریس لیڈر پرمود دوبے نے کالی چرن کے خلاف ٹیکراپارہ تھانہ میں ایف آئی آر درج کروائی تھی۔ اس کے بعد رائے پور پولیس نے کالی چرن کو مدھیہ پردیش سے 30 دسمبر کی صبح گرفتار کیا تھا جس کے بعد سے کالی چرن جیل میں بند تھا۔ ضلع عدالت میں ضمانت نہیں ملنے پر کالی چرن نے ہائی کورٹ کا دروازہ کھٹکھٹایا تھا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔