جھارکھنڈ: پلاموں میں فرقہ وارانہ تصادم کے بعد 19 فروری تک انٹرنیٹ بند، کئی لوگوں کے خلاف کیس درج، 13 گرفتار

جھارکھنڈ کے پلاموں ضلع واقع پانکی میں دو طبقات کے درمیان پتھر بازی اور پرتشدد ٹکراؤ کے واقعہ کے دوسرے دن جمعرات کو حالات قابو میں رہی، لیکن کشیدگی اب بھی برقرار ہے۔ حالات کو دیکھتے ہوئے ریاستی حکومت نے ضلع میں انٹرنیٹ سروس 19 فروری تک بند رکھنے کا حکم دیا ہے۔ اس درمیان پولیس نے تشدد کے ملزم 13 لوگوں کو گرفتار کر جمعرات کو جیل بھیج دیا ہے۔ معاملے میں دو ایف آئی آر درج کی گئی ہے جس میں 40-30 نامزد کے علاوہ 1000 سے زیادہ نامعلوم لوگوں کو ملزم بنایا گیا ہے۔

پلاموں کے ڈپٹی کمشنر اے ڈوڈے اور ایس پی چندن سنہا نے بتایا کہ ہنگامہ اور شرپسندی پھیلانے والے کسی بھی شخص کے ساتھ نرمی نہیں برتی جائے گی۔ لوگوں سے صبر اور امن برقرار رکھنے کی اپیل کی گئی ہے۔ سوشل میڈیا کے پوسٹ پر بھی سخت نگاہ رکھی جا رہی ہے۔ جمعرات کو پولیس اور سیکورٹی فورسز نے پانکی بازار میں فلیگ مارچ بھی کیا۔ اس کی قیادت پلاموں کے زونل آئی جی راج کمار لکڑا خود کر رہے تھے۔

دوسری طرف آج کثیر فورس کے ساتھ پورے علاقے میں فلیگ مارچ کرنے کے بعد پلاموں کے آئی جی راج کمار لکڑا نے بتایا کہ آج دونوں گروپوں سے مثبت گفتگو ہوئی۔ ان کی طرف سے اچھا رِسپانس ملا ہے۔ ہم حالات کو بہتر انداز سے قابو میں کر رہے ہیں۔ آئندہ 2-1 دنوں میں حالات معمول پر آ جائیں گے۔ اس واقعہ کے تعلق سے 2 ایف آئی آر درج کی گئی ہے جب کہ 11 لوگوں کو گرفتار کر لیا گیا ہے۔ 40-30 نامزد کیے گئے ہیں۔

اس سے قبل بدھ کے روز پانکی میں مہاشیوراتری کے موقع پر تورندوار بنانے کے تنازعہ میں دو طبقات کے درمیان پتھر بازی اور پرتشدد تصادم ہوا تھا۔ ایک مکان، دو بائک اور دو دکانیں آگ کے حوالے کر دی گئی تھیں۔ ایک گھنٹے سے زیادہ وقت تک شہر کا مسجد چوک علاقہ جنگ کا میدان بنا رہا تھا۔ ڈیڑھ درجن سے زیادہ لوگ زخمی ہوئے۔ کئی پولیس اہلکاروں کو بھی چوٹ لگی ہے جس میں علاقے کے پولیس ڈپٹی سپرنٹنڈنٹ آلو کمار ٹوڈو بھی شامل ہیں۔

اس واقعہ کو لے کر پورے پانکی بازار میں اگلے حکم تک دفعہ 144 کے تحت کرفیو نافذ کر دیا گیا ہے۔ کشیدگی کو دیکھتے ہوئے بدھ اور جمعرات کو ضلع کے اعلیٰ افسران نے پانکی میں ہی کیمپ کیے رکھا اور اس دوران پلاموں کے زونل آئی جی کی قیادت میں سیکورٹی فورسز نے پورے علاقے میں فلیگ مارچ بھی کیا۔ پورے ضلع میں پولیس گشتی سخت کر دی گئی ہے اور پولیس ہر آنے جانے والے پر نظر رکھ رہی ہے۔