ریکھا حکومت میں کانوڑ کیمپوں سے دیگر پارٹیوں کے ہورڈنگز پولیس کے ذریعہ جبراً ہٹایا جانا افسوسناک: دہلی کانگریس

نئی دہلی: دہلی کانگریس صدر دیویندر یادو نے بی جے پی کی ریکھا گپتا حکومت پر سخت تنقید کرتے ہوئے کہا کہ بی جے پی کے دورِ حکومت میں اگر کوئی سماجی تنظیم کسی دوسری سیاسی جماعت کے رہنماؤں کی تصاویر والا ہورڈنگ لگاتی ہے تو پولیس اور ایس ڈی ایم کے ذریعے انہیں زبردستی ہٹایا جا رہا ہے، جو انتہائی افسوسناک ہے۔ انہوں نے کہا کہ کانوڑ جیسے مقدس موقع پر اس قسم کی گھناؤنی سیاست نہیں ہونی چاہیے کیونکہ کانوڑ کیمپ کانوڑ یاتریوں کی خدمت کے لیے لگائے جاتے ہیں۔

دیویندر یادو نے کہا کہ بی جے پی کی ریکھا گپتا حکومت نے اس سال کانوڑیوں کے لیے وقت پر کوئی مناسب انتظام نہیں کیا اور اُلٹا کیمپوں کو دی جانے والی رقم پر بھی حد مقرر کر دی، جبکہ کانگریس کی شیلا دیکشت حکومت کے دوران کانوڑ کیمپوں میں لگنے والے ٹینٹ، کرسیاں، میز وغیرہ کا پورا خرچ حکومت خود برداشت کرتی تھی۔

آج دیویندر یادو نے بادلی اسمبلی حلقہ میں کرنال بائپاس، سنجے گاندھی ٹرانسپورٹ نگر میں ایک کانوڑ کیمپ کا شمع روشن کر افتتاح بھی کیا۔ بھگوان شیو کے عقیدتمند کانوڑیوں کی خدمت کے لیے ’جن سیوا سنگٹھن‘ سمے پور بادلی میں ہر سال کانوڑ کیمپ لگا کر یہاں سے گزرنے والے کانوڑ یاتریوں کی خدمت کرتا ہے۔ دیویندر یادو نے کیمپ پہنچ کر پوجا بھی کی اور وہاں موجود سہولیات کا معائنہ بھی کیا۔ خدمت کے جذبے سے لگائے گئے اس کانوڑ کیمپ میں نہ صرف دواؤں کی سہولت موجود ہے بلکہ کانوڑیوں کے لیے دن میں 3 وقت بھنڈارے کا انتظام بھی کیا گیا ہے۔

کیمپ میں موجود لوگوں کے درمیان پہنچ کر دیویندر یادو نے کہا کہ کانگریس ایک ایسی پارٹی ہے جو تمام مذاہب کا احترام اور بقائے باہم کے نظریے پر یقین رکھتی ہے۔ ہر مذہبی عقیدے کے لیے خیرسگالی اور سماجی ہم آہنگی کو فروغ دینا ہی ہماری پالیسی اور نظریہ ہے۔ انھوں نے دہلی کے لاکھوں کانوڑیوں سے اپیل کی کہ وہ گنگا جل لے جاتے وقت نظم و ضبط اور ٹریفک کے قوانین کا خاص خیال رکھیں اور دہلی این سی آر کے راستوں کے لیے دہلی ٹریفک پولیس کی جانب سے جاری ایڈوائزری کی خلاف ورزی نہ کریں۔ انھوں نے مزید کہا کہ کانوڑ کیمپ میں ہریدوار سے گنگا جل لینے کے لیے جانے والے اور واپسی پر کانوڑیوں کو جن مشکلات اور پریشانیوں کا سامنا ہوتا ہے، ان کا مکمل خیال رکھا جاتا ہے۔ کیمپ میں خدمت، دواؤں کی فراہمی اور 24 گھنٹے کھانے کی مناسب سہولت ہر سال کی طرح اس سال بھی فراہم کی گئی ہے۔ دہلی بھر میں کانوڑ کیمپ اس لیے لگائے گئے ہیں تاکہ جب کانوڑ تھک جائیں تو انہیں آرام کے لیے مناسب جگہ اور سہولت مل سکے۔