ہائی ٹیک زمانہ: ہار میں لگے جی پی ایس ٹریکر سے پوتے نےدادی کو تلاش کرلیا

ممبئی میں ایک خاندان نے بڑے ہی ہائی ٹیک طریقے سے اپنے عزیز کو تلاش کرلیا ہے۔ بتایا جارہا ہے کہ پوتے نے اپنی 79 سالہ دادی کے ہار میں چھوٹا سا جی پی ایس ٹریکر انسٹال کردیا تھا جس کے ذریعہ لاپتہ ہوئی دادی کی لوکیشن کا پتہ لگالیا۔ بزرگ خاتون جنوبی ممبئی میں شام کی چہل قدمی کے دوران اچانک لاپتہ ہو گئی، جس کے بعد ان کے خاندان کے لوگ کافی پریشان ہوئے۔

اسی دوران ان کے پوتے نے فلمی اسٹائل میں اپنی دادی کو تلاش کرنے میں کامیابی حاصل کی۔ پوتے نے ہار میں لگائے گئے جی پی ایس ٹریکر کی مدد سے لاپتہ دادی کا پتا لگایا۔ حالانکہ ٹریکر کی تفصیلات کا اشتراک نہیں کیا گیا ہے.

بتایا جاتا ہے کہ 3 دسمبر کو سائرہ بی تاج الدین ملا کو سیوری کے علاقے میں ایک دو پہیہ گاڑی نے ٹکر مار دی تھی۔ اس کے بعد مقامی لوگوں نے بزرگ خاتون کو اسپتال میں داخل کرایا۔ جب بزرگ خاتون رات گئے تک گھر واپس نہیں پہنچی تو اہل خانہ پریشان ہو گئے۔ اسی وقت ان کے پوتے محمد واصم  ایوب ملا نے ہار میں لگے جی پی ایس ڈیوائس کی مدد لی۔

جی پی ایس میں لوکیشن پریل واقع کے ای ایم اسپتال دکھائی دی جو ان کے گھر سے محض 5 کلومیٹر دور ہے۔ اس کے بعد بزرگ خاتون کا پورا خاندان ان کے پاس پہنچا اور پھرانہیں دوسرے اسپتال میں بھرتی کرایا۔ آن لائن اورآف لائن بازار میں متعدد منی جی پی ایس ٹریکرز دستیاب ہیں۔ پہلا ٹریکر ایپل ایئر ٹیگ کی طرح کام کرتا ہے، جس کی مدد سے بغیر کسی ریچارج پلان کے استعمال کیا جاسکتا ہے۔

ایپل ایئر ٹیگ ہزاروں کلومیٹر دور سے بھی اپنی لوکیشن شیئر کرتا ہے۔ وجے سیلز پر اس کی قیمت 2,799 روپئے ہے اور یہ ایپل کی فائنڈ مائی ایپ کے ساتھ کام کرتا ہے۔ ’جیو ٹیگ گو‘ کی مدد سے بھی گم شدہ اشیاء اور شخص کو تلاش کیا جاسکتا ہے۔ 999 روپئے والے جیوٹیگ جی پی ایس کھوئے ہوئے سامان، کار، بائیک، بیگ اور پالتو جانور وغیرہ پر لگایا جاسکتا ہے۔ یہ اینڈرائیڈ ڈیوائس کے ساتھ کام کرتا ہے۔