سی بی آئی، انکم ٹیکس اور ای ڈی کا غلط استعمال کیا جا رہا: اشوک گہلوت

جے پور: راجستھان کے وزیر اعلی اشوک گہلوت نے بھارتیہ جنتا پارٹی (بی جے پی) پر مرکزی بیورو آف انویسٹی گیشن (سی بی آئی)، انکم ٹیکس اور ای ڈی اداروں کا غلط استعمال کرنے کا الزام عائد کرتے ہوئے کہا ہے کہ جیسے ہی اتر پردیش میں انتخابات قریب آرہے ہیں سی بی آئی نے چھاپہ ماری شروع کر دی ہے۔ اشوک گہلوت نے آج یہ بات سوشل میڈیا کے ذریعے کہی۔ انہوں نے بتایا کہ جب بھی انتخابات آتے ہیں یا کسی بھی ریاست میں سیاسی بحران پیدا ہوتا ہے تو سی بی آئی، انکم ٹیکس اور ای ڈی کو خصوصی ہدایت کے ساتھ متحرک کیا جاتا ہے۔ جیسے ہی اترپردیش میں انتخابات قریب آگئے ہیں، سی بی آئی نے چھاپے مارنا شروع کر دیئے ہیں۔

وزیر اعلیٰ نے بتایا کہ اس سے قبل مغربی بنگال، راجستھان، مدھیہ پردیش اور کرناٹک وغیرہ ریاستوں میں بھی ان اداروں کا غلط استعمال کیا گیا تھا۔ انہوں نے کہا کہ ان تمام مرکزی اداروں کی ساکھ بڑی حد تک سالوں سے منصفانہ انداز میں کام کرنا ہے، لیکن جس طرح بی جے پی ان ایجنسیوں کو اپنا سیاسی ایجنڈا پورا کرنے کی ہدایت دے رہی ہے، ان کی ساکھ خراب ہوگئی ہے۔

اشوک گہلوت نے بتایا کہ ان اداروں میں کام کرنے والے زیادہ تر افسروں کے خود کے ذہن میں یہ بات آچکی ہے۔ پھر بھی انہیں مجبوری میں کارروائی کرنی پڑتی ہے۔ انہوں نے بتایا کہ ’’مجھے یقین ہے کہ وقت آنے پر لوگ بی جے پی کو ایک اچھا جواب دیں گے جو مرکزی اداروں کا سیاسی اور غلط استعمال کر رہی ہے۔‘‘