ہیٹ اسپیچ معاملہ: انوراگ ٹھاکر اور پرویش ورما کے خلاف ایف آئی آر کے مطالبہ پر سپریم کورٹ نے جاری کیا نوٹس

’ملک کے غداروں کو، گولی مارو...‘ نعرہ کے بعد بھی مرکزی وزیر انوراگ ٹھاکر اور بی جے پی کے ایک دیگر لیڈر پرویش ورما پر کیس درج نہ کرنے کو لے کر سپریم کورٹ نے دہلی کے ایک مجسٹریٹ کے فیصلے پر آج تلخ تبصرہ کیا ہے۔ سپریم کورٹ کا کہنا ہے کہ مجسٹریٹ نے کیس درج کرنے کے لیے جس سینکشن کے ہونے کا (آفیشیل منظوری) کا تذکرہ کیا تھا، وہ قانونی طور پر درست نہیں ہے۔

آج سپریم کورٹ نے بی جے پی رکن پارلیمنٹ انوراگ ٹھاکر اور پرویش ورما پر ایف آئی آر درج کرنے کے مطالبہ والی عرضی پر سماعت کرتے ہوئے دہلی پولیس کو نوٹس جاری کیا ہے۔ سی پی ایم لیڈر برندا کرات کی عرضی میں 2020 میں سی اے اے مخالف تحریک کے خلاف دونوں اراکین پارلیمنٹ کے اشتعال انگیز بیانات کا حوالہ دیا گیا ہے۔ اس سے قبل ذیلی عدالت اور ہائی کورٹ نے ان کی عرضی کو خارج کر دیا تھا۔

میڈیا رپورٹس کے مطابق جسٹس جوزف اور جسٹس بی وی ناگرتنا کی بنچ نے انوراگ ٹھاکر کی ’گولی مارو‘، والے تبصرہ پر خاص طور سے توجہ مرکوز کی ہے۔ سپریم کورٹ نے کہا کہ ’’میرا ماننا ہے کہ غدار کا مطلب غدارِ وطن ہوتا ہے؟ یہاں پر گولی مارو کا تعلق دوائی سے تو یقینا نہیں تھا۔‘‘ اس پر وکیل نے کہا ’’ہاں، اس کی منظوری اپنے آپ میں ایک ایشو ہے کہ عدالت کو اس پر غور کیوں کرنا چاہیے؟‘‘

سپریم کورٹ میں وکیل نے کہا کہ ’’متبادل علاج کی دستیابی کو ہائی کورٹ میں سماعت نہیں کرنے کی بنیاد نہیں ہونی چاہیے تھی۔ برائے کرم دیکھیں کہ کیا کہا گیا تھا۔ یہ بات شاہین باغ کے ضمن میں ایک ریلی میں کہی گئی تھی۔ غدار کا ذکر وہاں کے مظاہرین کے لیے تھا۔‘‘ وکیل نے مزید کہا کہ ’’مظاہرہ کرنے والا گروپ سیکولر ہو سکتا ہے، لیکن متعلقہ ایشو مذہبی تھا۔ برائے کرم دیکھیں کہ کیا کہا گیا تھا۔‘‘

عرضی دہندہ کی طرف سے سینئر وکیل سدھارتھ اگروال نے تقریروں کے ذریعہ عدالت کا رخ کیا تھا۔ اگروال نے کہا کہ ’’یہ لوگوں کو سب سے خطرناک طرح کے تشدد میں شامل ہونے کی اپیل کر رہا تھا۔‘‘ اس پر سپریم کورٹ نے کہا ’’دیکھتے ہیں، اگر سنگین جرم بنتا ہے تو پولیس ایف آئی آر درج کرنے کے لیے مجبور ہوتی ہے۔ اگر وہ ایسا کر رہے ہیں تو انھیں 7 دنوں میں ابتدائی جانچ پوری کرنی ہوگی۔‘‘

بہرحال، سپریم کورٹ کی ڈبل بنچ نے اسپیشل لیو پٹیشن پر نوٹس جاری کر کے جواب طلب کیا ہے۔ سبھی فریقین کو نوٹس کا جواب تین ہفتے کے اندر دینا ہے۔ جسٹس کے ایم جوزف اور جسٹس بی وی ناگرتنا کی بنچ نے سماعت کے دوران مجسٹریٹ کے فیصلے کو غلط مانتے ہوئے کہا کہ پہلی نظر میں یہ غلط لگتا ہے۔