جنوبی کشمیر کے دو مختلف علاقوں میں تصادم، 4 ملی ٹینٹ اور ایک شہری ہلاک

جنوبی کشمیر کے شوپیاں اور پلوامہ اضلاع میں جمعہ کو ہونے والے دو مختلف تصادموں میں چار ملی ٹینٹ اور ایک شہری ہلاک ہو گئے۔

کشمیر میں انکاؤنٹر کی فائل تصویر
کشمیر میں انکاؤنٹر کی فائل تصویر
user

یو این آئی

سری نگر: ضلع شوپیاں کے درگڑ سوگن علاقے میں جمعہ کی صبح سیکورٹی فورسز اور ملی ٹینٹوں کے درمیان تصادم آرائی میں حزب المجاہدین سے وابستہ دو ملی ٹینٹ اور ایک عام شہری ہلاک ہوا۔

تاہ ریاستی پولس کا دعویٰ ہے کہ تصادم کے دوران مارا جانے والا تیسرا فرد جنگجوئوں کا سرگرم بالائے زمین ورکر تھا۔ دوسری جانب ضلع پلوامہ کے نانر مڈورا اونتی پورہ علاقے میں جمعہ کی شام ہوئے ایک مختصر تصادم میں دو جنگجو مارے گئے۔ ذارئع نے تفصیلات فراہم کرتے ہوئے بتایا کہ شوپیاں کے درگڑ سوگن علاقے میں جمعہ کی صبح سیکورٹی فورسز اور جنگجوؤں کے درمیان ہوئی تصادم آرائی میں دو جنگجو اور ایک عام شہری ہلاک ہوا۔

ہلوک جنگجوؤں کی شناخت عابد منظور ماگرے عرف سجو ماگرے ولد منظور احمد ماگرے ساکنہ ناؤ پورہ پلوامہ اور ہلال احمد بٹ ساکنہ آرمولہ پلوامہ جبکہ عام شہری کی شناخت جاسم رشید شاہ ساکنہ مالناد زینہ پورہ کے بطور ہوئی ہے۔ جنگجوؤں کے چھپے ہونے کی ثقہ اطلاع ملنے پر فوج کی 44 آر آر، سی آر پی ایف اور جموں کشمیر پولس کے سپیشل آپریشنز گروپ کی ایک مشترکہ ٹیم نے جمعہ کی علی الصبح شوپیاں کے سگن درگڑ علاقے کو محاصرے میں لے کر تلاشی کارروائیاں شروع کیں۔


ذرائع نے بتایا کہ جوں ہی آپریشن ٹیم مشتبہ جگہ کی طرف بڑھنے لگی تو وہاں چھپے جنگجوؤں نے فورسز پر فائرنگ شروع کی جس کے ن-تیجے میں طرفین کے درمیان تصادم آرائی شروع ہوئی۔ دریں اثنا طرفین کے درمیان تصادم آرائی شروع ہونے کے بعد نوجوان اپنے گھروں سے باہر آئے اور سیکورٹی فورسز کے ساتھ متصادم ہوئے۔مقامی باشندوں نے بتایا کہ سیکورٹی فورسز اہلکاروں نے نوجوانوں کو منتشر کرنے کے لئے پیلٹ اور اشک آور گیس کے گولے داغے۔

ریاستی پولس کے ایک ترجمان نے ضلع پلوامہ میں ہوئے تصادم کی تفصیلات فراہم کرتے ہوئے کہا کہ نانر مڈورا اونتی پورہ علاقے میں جنگجوئوں کے چھپے ہونے کی ایک خاص اطلاع موصول ہونے کے بعد پولس اور سیکورٹی فورسز نے مشترکہ طورپر اس علاقے کو اپنے محاصرے میں لے کر اُنہیں ڈھونڈ نکالنے کے لئے گھر گھر تلاشی کارروائی کا آغاز کیا۔ تو اسی دوران خود کو سلامتی عملے کے گھیرے میں پا کر جنگجوئوں نے اندھا دھند گولیاں برسا کر فرار ہونے کی بھر پور سعی کی تاہم حفاظتی عملی نے اُنہیں فرار ہونے کا کوئی موقع فراہم نہیں کیا اور اس طرح سے طرفین کے مابین جھڑپ شرع ہوئی۔ کچھ عرصہ تک جاری رہنے والی اس جھڑپ میں دو جنگجو ہلاک ہوئے۔


انہوں نے کہا کہ جائے جھڑپ پر سیکورٹی فورسز نے مہلوک جنگجوئوں کی لاشیں برآمد کرکے اُن کی شناخت اور تنظیمی وابستگی کے حوالے سے جانچ پڑتال شروع کی ہے۔ تصادم کی جگہ اسلحہ وگولہ بارود اور قابلِ اعتراض مواد برآمد کرکے ضبط کیا گیا۔ انتظامیہ نے شوپیاں اور پلوامہ اضلاع میں موبائیل انٹرنیٹ خدمات منقطع کرادی ہیں۔

اس دوران ریاستی پولس کی طرف سے جاری ایک بیان میں کہا گیا کہ درگڑ سوگن علاقے میں جنگجوئوں کے چھپے ہونے کی ایک خاص اطلاع موصول ہونے کے بعد پولس اور سیکورٹی فورسز نے اس علاقے کو اپنے محاصرے میں لے کر انہیں ڈھونڈ نکالنے کے لئے گھر گھر تلاشی کارروائی کا آغاز کیا تو اسی دوران خود کو سلامتی عملے کے گھیرے میں پا کر جنگجوئوں نے اندھا دھند گولیاں برسا کر فرار ہونے کی بھر پور سعی کی تاہم حفاظتی عملے کی کارگر حکمت عملی نے اُنہیں فرار ہونے کا کوئی موقع فراہم نہیں کیا اور اس طرح سے طرفین کے مابین جھڑپ شروع ہوئی۔


بیان میں کہا گیا 'کچھ عرصہ تک جاری رہنے والی اس جھڑپ میں دو جنگجو اور اسی گروپ سے منسلک اور ایک معاون بھی مارا گیا۔ جائے جھڑپ کے نزدیک سیکورٹی فورسز نے تینوں مہلوک افراد کی نعشیں برآمد کرکے اُن کی شناخت عابد منظور ماگرے عرف سجو ٹائیگر ولد منظور احمد ماگرے ساکنہ نو پورہ پائین پلوامہ، بلال احمد بٹ ولد گل محمد ساکنہ اُرمولہ لاسی پورہ پلوامہ کے بطور ہوئی ہے۔ علاوہ ازیں جھڑپ کے دوران مارے گئے جنگجوئوں کے معاون کی پہچان جاسم رشید شاہ ولد عبدالرشید شاہ ساکنہ ملہ نار شوپیاں کے بطور ہوئی'۔

بیان میں دعویٰ کیا گیا کہ 'مذکورہ گروپ کالعدم تنظیم حزب سے وابستہ تھا ۔عابد اور منظور نامی مہلوک جنگجو سیکورٹی فورسز پر حملوں، عام شہریوں کو تشدد کا نشانہ بنانے کی کارروائیوں اور دیگرتخریبی سرگرمیوں میں قانون نافذ کرنے والے ادارے کو انتہائی مطلوب تھے۔ مذکورہ جنگجوئوں کے خلاف متعدد ایف آئی آر بھی درج ہیں۔ پولس ریکارڈ کے مطابق عابد کے خلاف سال 2016 سے جرائم کی ایک لمبی فہرست موجود ہے اور وہ علاقے میں سیکورٹی فورسز پر حملوں کی منصوبہ بندی کرنے اور انہیں پایہ تکمیل تک پہنچانے میں بھی پیش پیش رہ چکا ہے۔ مذکورہ شدت پسند کے خلاف کئی ایف آئی آر بھی درج ہیں'۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


Published: 31 May 2019, 11:10 PM