’40 فیصد کمیشن والوں کو صرف 40 سیٹ دینا‘، کرناٹک میں عوام سے خطاب کے دوران راہل گاندھی کی اپیل

کرناٹک اسمبلی انتخاب جیسے جیسے قریب آ رہا ہے، سیاسی لیڈروں کا کرناٹک دورہ بھی تیز ہوتا جا رہا ہے۔ بی جے پی اور کانگریس دونوں ہی قومی پارٹیوں کے سرکردہ لیڈران ریاست میں انتخابی مہم کا حصہ بن رہے ہیں۔ انتخابی تشہیر میں اب کانگریس کے سابق صدر راہل گاندھی بھی پیش پیش نظر آ رہے ہیں۔ آج انھوں نے کرناٹک کے بیدر ضلع میں ایک ریلی سے خطاب کرتے ہوئے بی جے پی پر خوب حملے کیے۔ انھوں نے کہا کہ ’’آج پورے ہندوستان میں بی جے پی اور آر ایس ایس کے لوگ جمہوریت پر حملہ کر رہے ہیں۔ بی جے پی اور آر ایس ایس ہندوستان میں نفرت اور تشدد کو فروغ دے رہے ہیں۔‘‘

راہل گاندھی نے کرناٹک انتخاب کے پیش نظر لوگوں سے وعدہ کیا کہ ریاست میں جو بھی وزیر اعلیٰ بنے گا، وہ پہلے دن ہی کیے گئے وعدوں کو پورا کرے گا۔ حالانکہ اس دوران انھوں نے یہ انکشاف نہیں کیا کہ وزیر اعلیٰ کون ہوگا۔ اپنی تقریر کے دوران راہل گاندھی نے کہا کہ ’’ہندوستان کے وزیر اعظم او بی سی کا بھلا نہیں چاہتے۔ 2011 میں یو پی اے حکومت کے دوران ذات پر مبنی مردم شماری ہوئی تھی، لیکن مودی حکومت نے اس مردم شماری کی رپورٹ کو جاری نہیں کیا۔ مردم شماری کی یہ رپورٹ سب کے سامنے آنی چاہیے۔‘‘ انھوں نے ریزرویشن میں 50 فیصد کیپ کو ہٹا دیئے جانے کا مطالبہ بھی کیا۔

اس دوران راہل گاندھی نے عوام سے اپیل کی کہ وہ کانگریس کو بڑھ چڑھ کر ووٹ دیں تاکہ کرناٹک اسمبلی انتخاب میں پارٹی کم از کم 150 سیٹ حاصل کرنے میں کامیاب ہو جائے۔ انھوں نے کہا کہ ’’ہمیں 40 فیصد کمیشن والی حکومت کو ہٹانا ہے اور 40 فیصد کمیشن والوں کو 40 سیٹ ہی دینی ہے۔‘‘ راہل گاندھی نے اپنے خطاب میں مرکزی حکومت کو بھی تنقید کا نشانہ بنایا۔ انھوں نے کہا کہ ’’جب ہم پارلیمنٹ میں بولتے ہیں تو ہمارا مائک بند کر دیا جاتا ہے۔ یہ ہم سے ڈرتے ہیں، کیونکہ ہم پارلیمنٹ میں سوال پوچھتے ہیں۔‘‘

پی ایم مودی اور گوتم اڈانی کے رشتوں کا تذکرہ کرتے ہوئے راہل گاندھی نے کہا کہ کانگریس اڈانی جیسے لوگوں کو فائدہ نہیں دیتی ہے۔ یہ مناسب نہیں کہ ملک کا پورا پیسہ ایک آدمی کو دے دیا گیا۔ انھوں نے کہا کہ پی ایم مودی نے 15 لاکھ کا وعدہ کیا تھا، ان کے جیسا جھوٹا وعدہ کانگریس نہیں کرتی ہے۔ کرناٹک انتخاب میں جو ہم بولیں گے، وہ چیزیں پہلی کابینہ میٹنگ میں کریں گے۔ راہل گاندھی نے واضح لفظوں میں کہا کہ ’’ہم لوگ ارب پتی کے لیے وعدہ نہیں کرتے ہیں، کانگریس عوام کے لیے وعدہ کرتی ہے۔‘‘