ای ڈی کو 48 گھنٹے کے لئے ہمارے ہاتھ میں دو، فڈنویس بھی شیوسینا کے حق میں ووٹ کریں گے! سنجے راؤت

ممبئی: شیو سینا کے لیڈر سنجے راؤت نے ایک مرتبہ پھر مرکز کی مودی حکومت پر حملہ بولتے ہوئے مرکزی ایجنسیوں کے غلط استعمال کا الزام عائد کیا۔ سنجے راؤت نے کہا کہ ای ڈی کو 48 گھنٹے کے لئے ہمارے ہاتھ میں دے کر دیکھئے، دیویندر فڈنویس بھی شیو سینا کے حق میں ووٹ کریں گے۔

سنجے راؤت اکثر ای ڈی کے غلط استعمال کا الزام عائد کرتے ہوئے مرکزی حکومت پر حملہ بولتے ہیں۔ سنجے راوت کہتے ہیں کہ شیوسینا ای ڈی سے خوف نہیں کھاتی۔ قبل ازیں، سنجے راؤت نے اپنے بیان میں کہا تھا، ’’پورے ملک میں مرکزی تفتیشی ایجنسی کی ٹائمنگ ہمیں معلوم ہے۔ جہاں کہیں بھی الیکشن ہونے والا ہوتا ہے یا جب کسی ریاستی حکومت کو غیر مستحکم کرنا ہوتا ہے تو ای ڈی اور سی بی آئی کو بھیجا جاتا ہے لیکن نہ مہاراشٹر جھکے گا اور نہ ہی شیو سینا ڈرے گی۔‘‘

خیال رہے کہ مہاراشٹر میں راجیہ سبھا کی چھ میں سے تین سیٹیں بی جے پی کے جیتنے کے بعد شیو سینا لیڈر سنجے راؤت نے جمعہ کے روز الیکشن کمیشن پر بی جے پی کی حمایت کرنے کا الزام عائد کیا تھا۔ سنجے راؤت نے کہا، ’’الیکشن کمیشن نے ہمارے ایک ووٹ کو منسوخ کر دیا۔ ہم نے دو ووٹوں پر اعتراض کیا تھا لیکن اس پر کارروائی نہیں کی گئی۔ الیکشن کمیشن نے بی جے پی کی حمایت کی۔‘‘

مہاراشٹر میں بی جے پی کے پیوش گوئل، انیل بونڈے اور دھننجے مہادک نے راجیہ سبھا انتخابات میں جیت حاصل کی، جبکہ مہا وکاس اگھاڑی (ایم وی اے) کے تین امیدواروں شیو سینا کے سنجے راؤت، این سی پی کے پرفول پٹیل اور کانگریس کے عمران پرتاپ گڑھی نے جیت حاصل کی ہے۔ بی جے پی اور ایم وی اے اتحاد کی جانب سے کراس ووٹنگ اور اصولوں کی خلاف ورزی کے حوالہ سے ای سی کے یہاں شکایت درج کرائی، جس کے بعد ووٹوں کی گنتی میں 8 گھنٹے کی تاخیر ہوئی۔