دہلی: جعفرآباد علاقے میں 4 لاشیں ملنے سے سنسنی

نئی دہلی: دہلی کے جعفرآباد تھانہ علاقہ میں ایک ہی گھر سے چار لاشیں ملنے سے علاقے میں سنسنی کا ماحول ہے، جاں بحق ہونے والوں میں میاں اور دو کمسن بچیاں شامل ہیں، متوفین کی شناخت اسرار احمد (40) فرہین(35) یشیکا(12) اورعنایا(11) کے طور پر ہوئی ہے۔ مبینہ طور پر سبھی کی موت گولی لگنے کے بعد واقع ہوئی ہے۔ واقعہ کی اطلاع ملتے ہی موقع پر پہنچی پولیس نے لاشوں کو پوسٹ مارٹم کے لیے مردہ خانے منتقل کرکے ابتدائی تفتیش شروع کر دی ہے۔

بتایا جاتا ہے کہ اسرار 4 سال قبل سعودی عرب سے وپس آیا تھا جہاں وہ گھڑیوں کا کاروبار کرتا تھا۔ یہ خاندان جعفرآباد کی گلی نمبر30/9 امام باڑے والی گلی میں چار منزلہ مکان میں رہائش پذیر تھا، اسرار کے والدین گراؤنڈ فلور پر رہتے تھے، اس کے چھوٹے بھائی کا خاندان پہلی منزل پر رہتا تھا جس کی بیوی کا انتقال کچھ روز پہلے ہوگیا تھا جبکہ دوسری منزل پر متوفی خاندان رہائش پذیر تھا۔

پولیس کو ابتدائی تفتیش میں معلوم ہوا ہے کہ اسرار احمد نے پہلے اپنی بیوی اور دونوں لڑکیوں کو گولی ماری جس کے بعد اس نے خود کو بھی گولی مار لی۔ پولیس کے مطابق اسرار احمد جینس کی پینٹ بنانے کا کاروبار کرتا تھا جس میں اس کو غیر معمولی نقصان کا سامنا کرنا پڑا تھا جس سے وہ کافی پریشان تھا۔ اس معاملہ میں حیرت انگیز بات یہ ہے کہ اسرار احمد کے دو بیٹے گھر کے باہر موجود تھے مگر اس نے ان دونوں کو کوئی نقصان نہیں پہچایا، ایسی صورتحال میں اسرار احمد نے اپنی بیوی اور دونوں بیٹیوں کا قتل کیوں کیا، پولیس اس کی جانچ کر رہی ہے۔

معاملہ کی تفتیش کی نگرانی کر رہے ڈی سی پی (نارتھ ایسٹ) سنجے کمار سین نے بتایا کہ شمال مشرقی دہلی کے جعفرآباد علاقے میں ایک 40 سالہ کاروباری نے پہلے اپنی بیوی اور دو بیٹیوں کا قتل کیا اور پھر خودکشی کرلی، جبکہ دو بیٹے بچ گئے ہیں۔ ابتدائی تفتیش سے معلوم ہوا ہے کہ ممبئی میں اس کا جینس کی پینٹ کا کاروبار ہے جس میں اس کو بہت زیادہ نقصان ہو رہا تھا۔ ڈی سی پی نے کہا کہ معاملہ کی مزید تفتیش جاری ہے۔