دہلی کے لیفٹیننٹ گورنر انل بیجل کورونا پازیٹو

انل بیجل نے کہا کہ کورونا کی معمولی علامتیں ظاہر ہونے کے بعد انہوں نے خود کو آئسولیٹ یعنی سب سے علیحدہ کر لیا ہے، انہوں نے کہا کہ حال ہی میں ان کے رابطہ میں آنے والے تمام افراد اپنی جانچ کروا لیں

دہلی کے لیفٹیننٹ گورنر انل بیجل / Getty Images
دہلی کے لیفٹیننٹ گورنر انل بیجل / Getty Images
user

قومی آوازبیورو

کورونا وبا کا قہر بڑھتا ہی جا رہا ہے اور یہ وائرس حملہ کرتے ہوئے یہ بھی تفریق نہیں کر رہا کہ جس پر وہ حملہ کر رہا ہے وہ کس عمر کا ہے، کس عہدے پر فائز ہے، کس پیشے سے اس کا تعلق ہے، کس پارٹی کی نمائندگی کرتا ہے اور وہ کتنا امیر ہے۔ کورونا کو بس اپنے شکار سے مطلب ہے۔ آج تک کے معروف اینکر روہت سردانا کے اچانک انتقال کی خبر کے بعد یہ خبر آئی کہ دہلی کے لیفٹیننٹ گورنر انل بیجل کورونا سے متاثر ہو گئے ہیں ۔ اس خبر کے بعد دہلی میں چھائے خوف میں مزید اضافہ ہو گیا۔

دہلی کے لیفٹیننٹ گورنر انل بیجل نے ٹوئٹ کر کے اطلاع دی ہے کہ ان میں کورونا کی معمولی علامتیں پائی گئی ہیں، اس لئے انہوں نے خود کو آئیسولیٹ یعنی سب سےعلیحدہ کر لیا ہے۔ انہوں نے یہ بھی کہا ہے کہ حال ہی میں جو ان سے رابطہ میں آئے ہوں وہ اپنی جانچ کروا لیں۔ انہوں نے مزید لکھا ہے کہ وہ اپنی رہائش سے کام کی نگرانی کرتے رہیں گے۔

واضح رہے کل دہلی میں 73 ہزار سے زیادہ ٹیسٹ ہوئے تھے جس میں سے 24 ہزار سے زیادہ لوگ کورونا متاثر پائے گئے ہیں یعنی یہ شرح 31 فیصد سے زیادہ رہی ہے۔ ادھر کل کورونا سے مرنے والوں کی تعداد 395 تھی۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔