کورونا سے دہلی بے حال، 24 گھنٹوں میں 27561 نئے کیسز درج، 40 اموات

کورونا سے اب تک ہوئی ہلاکتوں کی بات کی جائے تو یہ تعداد 25 ہزار 240 تک پہنچ گئی ہے، دہشت ناک بات یہ ہے کہ 12 جنوری کو دہلی میں انفیکشن کی شرح 26.22 فیصد درج کی گئی۔

کورونا ٹیسٹ، تصویر یو این آئی
کورونا ٹیسٹ، تصویر یو این آئی
user

قومی آوازبیورو

ہندوستان میں کورونا کی رفتار دن بہ دن بڑھتی جا رہی ہے۔ ملک کی راجدھانی دہلی میں حالات انتہائی تشویشناک نظر آ رہے ہیں کیونکہ سرگرم کیسز کی تعداد بہت تیزی کے ساتھ بڑھ رہی ہے۔ دہلی میں گزشتہ 24 گھنٹوں میں 27 ہزار 561 نئے کورونا کیسز سامنے آئے ہیں جو خطرناک حالات کی نشاندہی کر رہے ہیں۔ اس دوران 40 مریضوں کی موت بھی واقع ہوئی ہے۔ نیا سال شروع ہونے کے بعد سے اب تک 133 کورونا متاثرین کی موت ہو چکی ہے۔ کورونا سے اب تک ہوئی ہلاکتوں کی بات کی جائے تو یہ تعداد 25 ہزار 240 تک پہنچ گئی ہے۔ دہشت ناک بات یہ ہے کہ 12 جنوری کو دہلی میں انفیکشن کی شرح 26.22 فیصد درج کی گئی۔

دہلی میں اس وقت 56 ہزار 991 مریض ہوم آئسولیشن میں ہیں۔ راجدھانی میں سرگرم کورونا مریضوں کی شرح 4.79 فیصد ہے جب کہ ریکوری شرح 93.70 فیصد ہے۔ 24 گھنٹے میں 14 ہزار 957 لوگ ڈسچارج ہوئے ہیں۔ اب تک مجموعی طور پر 15 لاکھ 5 ہزار 31 افراد کورونا کو شکست دے چکے ہیں۔ دہلی میں کینٹنمنٹ زون کی تعداد ابھی 20 ہزار 878 ہے، جب کہ کورونا سے اموات کی شرح 1.5 فیصد ہے۔


واضح رہے کہ منگل کے روز 21 ہزار 259، پیر کے روز 19 ہزار 166 اور اتوار کے روز 22 ہزار سے زائد نئے کورونا معاملے سامنے آئے تھے۔ ان تین دنوں میں انفیکشن کی شرح بالترتیب 25.65، 25 اور 23 فیصد تک پہنچ گئی تھی۔ گزشتہ 8 مہینے میں سب سے زیادہ کورونا کے معاملے بدھ کو ہی سامنے آئے ہیں۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔