دہلی اسمبلی انتخاب: دہلی والوں سے روبرو ہونے کے لیے کل ’نیائے چوپال‘ لگائیں گے راہل گاندھی
خواتین، دلت، جھگی والوں، غیر منظور شدہ کالونیوں، آٹو ڈرائیوروں وغیرہ کے الگ الگ گروپ بنائے جائیں گے۔ اسٹیڈیم کے درمیان میں ایک ’ریمپ‘ بنایا گیا ہے جس پر راہل گاندھی چلتے ہوئے لوگوں سے بات کریں گے۔

دہلی اسمبلی انتخاب کے لیے تمام سیاسی پارٹیوں نے تیاریاں شروع کر دی ہیں۔ کانگریس لیڈر راہل گاندھی بھی کل سے دہلی اسمبلی انتخاب پیش نظر متحرک نظر آئیں گے۔ بدھ کو راہل گاندھی دہلی کے اندرا گاندھی اسٹیڈیم میں ’نیائے چوپال‘ لگائیں گے اور اس کی تیاری مکمل ہو گئی ہے۔ اس ’نیائے چوپال‘ کو لے کر کانگریس لیڈران و کارکنان پُرجوش دکھائی دے رہے ہیں۔ امید کی جا رہی ہے کہ اس تقریب میں لوگوں کی بڑی تعداد جمع ہوگی۔
راہل گاندھی ہمیشہ سے اس بات پر یقین رکھتے ہیں کہ وہ عوام سے براہ راست ملیں اور ان کے احوال جانیں۔ اس کی مثال ’بھارت جوڑو یاترا‘ ہے جب راہل گاندھی نے سینکڑوں کلو میٹر کا سفر پیدل کیا تھا اور لوگوں سے ان کے مسائل جانے تھے۔ ایک بار پھر راہل گاندھی کو عوام کے ساتھ اندرا گاندھی اسٹیڈیم میں بات کرتے ہوئے دیکھا جائے گا، وہ لوگوں سے براہ راست ملاقات کرتے نظر آئیں گے۔ کل ہونے والے پروگرام میں الگ الگ گروپ کے لوگوں سے راہل گاندھی بات چیت کریں گے اور ان کو درپیش مسائل جاننے کی کوشش کریں گے۔ خواتین، دلت، جھگی والوں، غیر منظور شدہ کالونیوں، آٹو ڈرائیوروں سمیت مختلف طبقات سے تعلق رکھنے والے افراد اور کارکنان کے الگ الگ گروپ بنائے جائیں گے۔ اسٹیڈیم کے درمیان میں ایک ’ریمپ‘ بنایا گیا ہے جس پر راہل گاندھی چلتے ہوئے لوگوں سے بات کریں گے۔
قابل ذکر ہے کہ 2013 کے بعد سے ہی کانگریس دہلی کی اقتدار سے باہر ہے۔ کیجریوال کو ایک بہتر متبادل کے طور پر دہلی والوں نے اپنی حکومت سونپی اور گزشتہ 11 سالوں سے دہلی پر کیجریوال کی حکومت ہے۔ اس حکومت کو اقتدار سے باہر کرنا کانگریس کے لیے ایک بڑا چیلنج ہے، کیونکہ کانگریس کا پورا ووٹ بینک عام آدمی کی طرف چلا گیا ہے۔ کانگریس پارٹی کے لیے ایک خوش آئند بات یہ ہے کہ ایم سی ڈی کے انتخاب میں کانگریس کی کارکردگی کافی حد تک بہتر رہی۔ کانگریس کو دہلی میں اپنی حکومت واپس لانے کے لیے بی جے پی اور عآپ دونوں سے سخت مقابلہ کا سامنا کرنا پڑے گا۔ حالانکہ ’دہلی نیائے یاترا‘ سے کانگریس کو فائدہ ہونے کی امید ہے۔ یاترا کے دوران لوگوں نے کانگریس کے تئیں دلچسپی کا مظاہرہ کیا ہے۔
بہرحال، ایسا نہیں ہے کہ دہلی اسمبلی انتخاب سے متعلق کانگریس کی انتخابی تیاری کل ’نیائے چوپال‘ سے شروع ہو رہی ہے، بلکہ کانگریس نے تو مہینوں پہلے سے اپنی سرگرمی شروع کر دی ہے۔ کانگریس کے دہلی پردیش کمیٹی صدر دیویندر یادو نے ایک ماہ طویل ’دہلی نیائے یاترا‘ کامیابی کے ساتھ گزشتہ دنوں پوری کی ہے۔ اس یاترا کے دوران انہوں نے دہلی کے سبھی 70 اسمبلی حلقوں کا پیدل دورہ کیا اور لوگوں سے ملاقات کر کے ان کے احوال کو جاننے کی کوشش کی۔ ’دہلی نیائے یاترا‘ کے دوران کانگریس پارٹی کو عوام کی زبردست حمایت حاصل ہوئی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔