دہلی: کورونا کے بے قابو حالات پر امت شاہ اور کیجریوال کی تیسری مرتبہ میٹنگ

نئی دہلی: کورونا وائرس کے انفیکشن کے مسلسل بڑھتے معاملوں کے دوران مرکزی وزیر داخلہ امت شاہ نے آج دہلی اور قومی راجدھانی علاقے میں صورت حال کا جائزہ لیا۔ امت شاہ نے دہلی میں کورونا وبا کی صورت حال پر ایک ہفتہ میں تیسری مرتبہ میٹنگ کی ہے۔ دہلی کے وزیراعلی اروند کیجری وال، دہلی پولس کمشنر ایس این شری واستو، قومی راجدھانی علاقے کے ضلعوں کے سینئر افسران کے ساتھ ساتھ داخلہ اور وزارت صحت اور آئی سی ایم آر کے افسران نے بھی میٹنگ میں شرکت کی۔

کورونا وائرس کے انفیکشن کی تازہ صورت حال کے ساتھ ساتھ اس سے نمٹنے کی تیاریوں اور منصوبوں پر بھی بات چیت کی گئی۔ اس کے ساتھ ہی راجدھانی اور این سی آر کے ضلعوں کے درمیان لوگوں کی آمدورفت کے سلسلے میں بھی بات چیت ہوئی۔ مرکزی حکومت کے ذریعہ کورونا انفیکشن سے نمٹنے کے لئے کیے گئے اقدامات اور اعلانات کا بھی میٹنگ میں ذکر کیا گیا۔ امت شاہ نے گزشتہ چار دنوں سے دہلی میں کورونا کی صورت حال کے سلسلے میں لفٹننٹ گورنر انل بیجل، وزیراعلی اروند کیجری وال اور سینئر افسران کے ساتھ مسلسل میٹنگیں کی ہیں۔

دہلی کے تینوں نگرنگموں کے ساتھ بھی امت شاہ نے میٹنگ کی۔ انہوں نے دہلی کے سبھی سیاسی پارٹیوں کے لیڈروں کے ساتھ بھی کورونا سے نمٹنے کی حکمت عملی پر بات چیت کی تھی۔ وزیر داخلہ نے دہلی حکومت کے کورونا علاج کے لئے متعین اسپتال لوک نائک جے پرکاش کا بھی دورہ کیا تھا۔ اس کے بعد راجدھانی کے سبھی اسپتالوں میں نگرانی کے لئے سی سی ٹی وی کیمرے لگائے گئے ہیں۔

امت شاہ کے ساتھ میٹنگ کے دوران آئے مشوروں کی بنیاد پر ہی دہلی میں کورونا جانچ کی قیمت ٹیکس کے ساتھ 2400 روپے طے کی گئی ہے۔ اس کے علاوہ کنٹینمینٹ زون میں ریپیڈ ٹسٹ بھی بڑی تعداد میں کیے جارہے ہیں۔ راجدھانی دہلی میں کورونا وائرس کی وبا میں مسلسل اضافہ ہورہا ہے اور بدھ کے اعدادوشمار کے مطابق ریکارڈ 2414 نئے معاملے سامنے آنے سے مجموعی طور سے یہ اعدادوشمار 47 ہزار سے زیادہ ہوگئی ہے۔ اس دوران کووڈ کے 67 مریضوں کی موت ہوئی ہے۔