یوپی میں کورونا کا قہر! لکھنؤ سی ایم او دفتر سیل، اکاؤنٹنٹ ہوا پازیٹو، کئی وزرا بھی زد میں

لکھنؤ: اتر پردیش کی راجدھانی لکھنؤ میں سی ایم او (چیف میڈیکل آفیسر) کے دفتر کو سیل کر دیا گیا ہے۔ یہاں کے ایک اکاؤنٹنٹ کے کورونا کی ٹیسٹ رپورٹ مثبت پائی گئی ہے۔ اس کے علاوہ یہاں کے جی ایم یو کے تین ڈاکٹر اور 11 پولیس اہلکار بھی اس سے متاثر پائے گئے ہیں۔ افسران نے اتوار کو یہ اطلاع دی۔ سی ایم او دو دنوں تک گھر سے ہی کام سنبھالیں گے اور اس دوران ان کی عمارت کی صاف صفائی کی جائے گی۔

سی ایم او ڈاکٹر نریندر نے کہا، ’’30 سال اکاؤنٹنٹ نیشنل ہیلٹھ مشن سے وابستہ دفتر کے دوسرے فلور پر کام کرنے کے لئے مقرر ہیں۔ جمعرات کو گلے میں خراش ہونے پر اس کا ریڈ کراس سوسائٹی مرکز میں ٹیسٹ کیا گیا۔ ہفتہ کے روز اس کی رپورٹ آئی جوکہ مثبت تھی۔‘‘

اکاؤنٹنٹ کے رابطہ میں آئے تقریباً 15 ملازمین کے نمونے بھی ٹیسٹ کے لئے بھیجے جا رہے ہیں۔ اسی بیچ ریلوے پولیس اور پروونشیل آرمس کانسٹیبلوری کے جوانوں کے بعد ہفتہ کے روز وی آئی پی حفاظتی ڈیوٹی پر تعینات ایک جوان سمیت 11 اور پولیس اہلکار کو بھی اس وائرس سے متاثر پایا گیا ہے۔ اس کے علاوہ کنگ جارج میڈکل یونیورسٹی (کے جی ایم یو) کے تین ڈاکٹروں میں بھی اس انفیکشن کی تصدیق ہوئی۔

کے جی ایم یو میڈیا سیل کے انچارج سندیپ تیواری نے کہا، ’’ان تین ڈاکڑوں میں سے ایک آئی سی یو میں تعینات شعبہ میڈیسن کے سینئر ارکان ہیں، جبکہ دو جونئر ریزیڈنٹ ڈاکٹر ہیں۔ ان کے رابطہ میں آئے لوگوں کا پتہ لگاکر ان کا بھی معائنہ کیا جا رہا ہے۔‘‘

اب تک کے جی ایم یو کے 28 ملازمین کی کورونا ٹیسٹ رپورٹ مثبت پائی گئی ہے۔ اس کے علاوہ لکھنؤ میں اب تک 59 پولیس اہلکار اور ان کے کنبہ کے ارکان کورونا سے متاثر ہوئے ہیں۔

دوسری طرف کورونا انفیکشن اب ریاست کے وزار کو اپنی زد میں لے رہا ہے۔ اب یو پی کے وزیر کھیل اوپیندر تیواری کی کورونا رپورٹ مثبت پائی گئی ہے۔ یہ خبر منظر عام پر آنے کے بعد صورت حال نازک ہے۔ اس سے پہلے ہفتہ کو یوپی کے ہوم گارڈ وزیر چیتن چوہان کورونا سے متاثر پائے گئے تھے۔