دہلی: وزیر اعلیٰ کیجریوال نے ’لاک ڈاؤن‘ مزید ایک ہفتہ بڑھانے کا کیا اعلان

دہلی کے وزیر اعلیٰ اروند کیجریوال نے اپنے ٹوئٹر ہینڈل کے ذریعہ آج خبر دی کہ لاک ڈاؤن مزید ایک ہفتے کے لیے بڑھایا جاتا ہے۔

اروند کیجریوال، تصویر یو این آئی
اروند کیجریوال، تصویر یو این آئی
user

تنویر

راجدھانی دہلی میں لاک ڈاؤن کے باوجود کورونا انفیکشن کے پھیلاؤ میں کسی طرح کی کمی دیکھنے کو نہیں مل رہی ہے۔ یہی وجہ ہے کہ دہلی کے وزیر اعلیٰ اروند کیجریوال نے لاک ڈاؤن کو مزید ایک ہفتہ بڑھانے کا اعلان کر دیا ہے۔ یہ خبر انھوں نے اپنے ٹوئٹر ہینڈل کے ذریعہ دی۔ یہاں قابل ذکر ہے کہ پہلے سے ہی یہ اندیشہ ظاہر کیا جا رہا تھا کہ دہلی میں لاک ڈاؤن مزید ایک ہفتہ بڑھ سکتا ہے، لیکن امید کی جا رہی تھی کہ کیجریوال اس کا اعلان اتوار کو کریں گے۔

واضح رہے کہ 3 مئی کی صبح 5 بجے تک دہلی میں لاک ڈاؤن نافذ تھا، اور اب جب کہ مزید ایک ہفتہ لاک ڈاؤن بڑھا دیا گیا ہے تو 10 مئی کی صبح 5 بجے تک لاک ڈاؤن کی پابندیاں نافذ رہیں گی۔ تازہ لاک ڈاؤن میں کسی تبدیلی سے متعلق جانکاری نہیں دی گئی ہے جس سے ظاہر ہے کہ پہلے جن چیزوں پر پابندیاں تھیں، ان پر آگے بھی پابندی قائم رہے گی۔

اس درمیان قابل ذکر بات یہ ہے کہ جمعہ کو ہی دہلی کے کاروباری اداروں نے اعلان کر دیا تھا کہ وہ 3 مئی کے بعد بھی اپنی دکانیں نہیں کھولنے جا رہے ہیں۔ ان کی طرف سے اپنی خوشی سے ’لاک ڈاؤن‘ نافذ کیے جانے کی بات کہی گئی تھی۔ یہ فیصلہ کنفیڈریشن آف آل انڈیا ٹریڈرس (کیٹ) کے ذریعہ بلائی گئی ایک ویڈیو کانفرنس میٹنگ میں 150 سے زائد اہم کاروباری اداروں کے لیڈروں نے متفقہ طور پر فیصلہ لیا ہے۔


موجودہ مشکل حالات میں کاروباری اداروں کو امید تھی کہ کیجریوال حکومت بھی کورونا بحران کے درمیان لاک ڈاؤن کو آگے بڑھانے کا اعلان کرے گی۔ ذرائع کے مطابق کیٹ کی جانب سے دہلی کے وزیر اعلیٰ کیجریوال اور لیفٹیننٹ گورنر انل بیجل کو ایک خط لکھا گیا تھا۔ اس خط میں بھی اسی بات پر فکر ظاہر کی گئی کہ لاک ڈاؤن لگانے کے بعد بھی کورونا کی رفتار دھیمی نہیں پڑی ہے۔ اسی وجہ سے لاک ڈاؤن کو مزید بڑھانے کی اپیل کی گئی۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔