اپنے استاد اڈوانی کا بھی احترام نہیں کرتے مودی: راہل گاندھی

کانگریس کے صدر راہل گاندھی نے ممبئی میں پارٹی کے بوتھ سطحی کارکنان سے خطاب کرتے ہوئے آر ایس ایس اور بی جے پی پر جم کر حملہ بولا۔ راہل گاندھی نے لال کرشن اڈوانی کا ذکر کرتے وزیر اعظم نریندر مودی پر حملہ بولا اور کہا کہ، ’’لال کرشن اڈوانی وزیر اعظم نریندر مودی کے گورو (استاد) رہے ہیں لیکن میں کئی تقاریب میں دیکھ چکا ہوں کہ وہ ان کا بالکل بھی احترام نہیں کرتے۔ انہوں نے کہا کہ اڈوانی کا وزیر اعظم مودی سے زیادہ احترام کانگریس پارٹی کرتی ہے۔

کانگریس کے صدر نے مزید کہا، ’’سابق وزیر اعظم اٹل بہاری باجپئی کے خلاف ہم نے چناؤ لڑا تھا لیکن جب وہ دہلی کے ایمس میں داخل ہوئے تو سب سے پہلے میں ان کی عیادت کے لئے گیا کیوں میں کانگریس کا سپائی ہوں۔ وہ ملک کے وزیر اعظم رہ چکے ہیں۔ باجپئی جی نے ہمارے ملک کے لئے کام کیا ہے اور وہ ہمارے وزیر اعظم رہے ہیں، اس وجہ سے ہم ان کا احترام کرتے ہیں۔ یہی ہماری روایت ہے۔‘‘

راہل گاندھی نے آر ایس ایس اور بی جے پی کے نظریہ پر نشانہ لگاتے ہوئے کہا کہ ایک سینئر رہنما نے مجھ سے کہا کہ وہ گزشتہ 50 سال سے کانگریس کے خلاف لڑ رہے ہیں اور ان 50 سالوں کے بعد انہیں یہ احساس ہوا کہ اس ملک کو کوئی پارتی محفوظ رکھ سکتی ہے تو وہ کانگریس ہی ہے۔ صرف کانگریس ہی بی جے پی اور آر ایس ایس کے نظریہ سے مقابلہ کر سکتی ہے اور اسے مات دے سکتی ہے۔

کارکنان سے خطاب کرتے ہوئے راہل نے مزید کہا، ’’بی جے پی ابھی حال ہی میں کرناٹ میں ہاری ہے اور گجرات میں مشکل سے حکومت بچا پائی ہے۔ راجستھان، چھتیس گڑھ اور مدھیہ پردیش میں کانگریس اپوزیشن پارٹیوں کے ساتھ ملک کر بی جے پی کو ہرائے گی۔ ساتھ ہی 2019 کے چناؤ میں بھی بی جے پی کو ہار کا منہ دیکھنا پڑے گا۔‘‘ انہوں نے کہا کہ، ’’پی ایم مودی کی آواز میں گھبراہٹ ہے لیکن میری آواز میں نہیں کیوں کہ میں سچائی کا سپائی ہوں۔‘‘

کانگریس کے صدر نے وزیر خزانہ پر طنز کرتے ہوئے کہا کہ ارون جیٹلی کہتے ہیں کہ کسانوں کا قرض معاف کرنا ان کی پالیسی نہیں ہے۔ ’میک ان انڈیا‘ کی بات کرتے ہیں لیکن غریب آدمی کو ایک پیسہ نہیں دیتے۔