سی ایم کے نام پر قیاس آرائیوں کے درمیان کانگریس نے پیش کیا ’کرپٹ مودی گیم‘

پانچ ریاستوں کے اسمبلی انتخابات اختتام پزیر ہو چکے ہیں اور تین ہندی زبان والی ریاستوں میں بی جے پی کو کراری شکست کا سامنا کرنا پڑا ہے۔ اب ان تین ریاستوں کے وزرائے اعلی کون ہوں گے اس پر میڈیا میں قیاس آرائیوں کا دور جاری ہے۔ اخبار، ویب سائٹس، نیوز چینلز، خود ساختہ صحافیان، سوشل میڈیا کے جنگجو اور یہاں تک کہ جیوتشی (پیشن گو) تک میدان میں کود چکے ہیں اور راجستھان، مدھیہ پردیش اور چھتیس گڑھ کے وزرائے اعلیٰ کے ناموں پر طرح طرح کے دعوے کر رہے ہیں۔

ایسے میں کانگریس نے ایک آن لائن گیم شروع کیا ہے۔ یہ مائنڈ اینڈ میموری گیم 24 خانوں پر مشتمل ہے اور ہر خانے پر کرپٹ (بدعنوان) مودی لکھا ہے۔

جیسے ہی آپ ایک خانے پر کلک کرتے ہیں تو اس خانے میں اینی میشن کے ذریعہ ایک گھوٹالہ کا نام نظر آتا ہے۔ اس طرح 24 خانوں میں کانگریس نے مودی حکومت کے دور میں ہوئے 12 گھوٹالوں کے نام لکھے ہیں۔ اس گیم میں کھیلنے کے لئے آپ کو ایک ہی گھوٹالے کے دو خانوں کو کھولنا ہے۔ جیسے ہی ایک جیسے دو نام میچ ہو جاتے ہیں وہ کھلے رہ جاتے ہیں۔ ورنہ خانے بند ہو جاتے ہیں۔

کانگریس نے اس پزل میں جن گھوٹالوں کے نام دئے ہیں ان میں اڈانی پاور گھوٹالہ، رافیل گھوٹالہ، چکی گھوٹالہ، ای ٹینڈر گھوٹالہ، شرڈی گھوٹالہ، کے جی بیسن گھوٹالہ، مائننگ گھوٹالہ، نیرو مودی گھوٹالہ، پی ڈی ایس گھوٹالہ، مودی گیٹ، مالیا گھوٹالہ اور جے شاہ کا گھوٹالہ شامل ہے۔

جب آپ تمام خانوں کو کھولنے میں کامیاب ہو جاتے ہیں تو پیغام نظر آتا ہے، ’’آپ نے مودی کے ذریعہ کی گئی مکمل بدعنوانی کو پکڑ لیا ہے۔‘‘ کانگریس کا یہ گیم سوشل میڈیا پر کافی مقبول ہو رہا ہے۔