عید میلاد النبیؐ پر کانگریس رہنماؤں کی مبارکباد، حضرت محمدؐ کے امن، مساوات اور بھائی چارے کے پیغام کو یاد کیا گیا

نئی دہلی: عید میلاد النبیؐ کے موقع پر کانگریس کے سرکردہ رہنماؤں نے مبارکبادی پیغامات جاری کیے اور پیغمبر اسلام حضرت محمد مصطفیٰ صلی اللہ علیہ وسلم کے امن، مساوات اور بھائی چارے کے پیغام کو یاد کیا۔ رہنماؤں نے ملک و قوم کے اتحاد اور خوشحالی کے لیے دعا بھی کی۔

راہل گاندھی نے اپنے پیغام میں کہا، ’’عید میلاد النبیؐ مبارک ہو! یہ مبارک موقع سب کے لیے خوشی، امن، اچھی صحت اور خوشحالی لے کر آئے۔‘‘ انہوں نے کہا کہ یہ دن ہم سب کے لیے خیر و برکت کا ذریعہ بنے۔

کانگریس صدر ملکارجن کھڑگے نے اپنے بیان میں کہا، ’’سب کو عید میلاد النبیؐ مبارک ہو۔ یہ بابرکت موقع امن، خوشحالی اور ہمدردی کو فروغ دے اور سب کو خیر سگالی کی روح میں متحد کرے۔‘‘ انہوں نے اس بات پر زور دیا کہ حضرت محمد صلی اللہ علیہ وسلم کی تعلیمات آج بھی انسانیت کے لیے رہنمائی کا ذریعہ ہیں۔

پرینکا گاندھی واڈرا نے اپنے پیغام میں کہا، ’’آپ سب کو عید میلاد النبیؐ کی دلی مبارکباد! امن اور بھائی چارے کا پیغام دینے والے پیغمبر حضرت محمد صلی اللہ علیہ وسلم کی یومِ پیدائش کے اس مقدس موقع پر میں تمام ہم وطنوں کے لیے خوشی اور خوشحالی کی دعا کرتی ہوں۔‘‘ پرینکا گاندھی نے کہا کہ حضرت محمدؐ کی حیاتِ طیبہ ہمیں انسانیت کی خدمت اور سماجی انصاف کا درس دیتی ہے۔

کانگریس پارٹی کے سرکاری ایکس ہینڈل سے جاری پیغام میں کہا گیا، ’’عید میلاد النبیؐ کے مبارک موقع پر ہم حضرت محمد صلی اللہ علیہ وسلم کے امن، ہمدردی اور مساوات کے پیغام کو یاد کرتے ہیں۔ یہ دن ہمیں اپنی زندگی میں محبت اور بھائی چارے کو اپنانے کی ترغیب دے۔ سب کو پرخلوص مبارکباد!‘‘ پارٹی نے کہا کہ یہ موقع انسانیت کو قریب لانے اور محبت کو عام کرنے کا دن ہے۔

عید میلاد النبیؐ دنیا بھر کے مسلمانوں کے لیے نہایت عقیدت اور احترام کا دن ہے۔ یہ دن پیغمبر اسلام حضرت محمدؐ کی ولادت باسعادت کی یاد میں منایا جاتا ہے۔ اس موقع پر مسلمان جلوس نکالتے ہیں، محافل میلاد کا انعقاد کرتے ہیں اور خیرات کے ذریعے ضرورت مندوں کی مدد بھی کرتے ہیں۔