شملہ میونسپل کارپوریشن الیکشن میں کانگریس کا دھماکہ، 34 میں سے 24 وارڈوں میں لہرایا جیت کا پرچم

شملہ میونسپل کارپوریشن انتخاب میں کانگریس نے بی جے پی کو زبردست پٹخنی دی ہے۔ 34 میں سے 24 وارڈوں میں کانگریس نے جیت کا پرچم لہرایا ہے، جب کہ بی جے پی کو محض 9 وارڈوں میں کامیابی حاصل ہوئی ہے۔ ایک وارڈ سی پی ایم کے حصے میں گیا ہے۔ دلچسپ بات یہ ہے کہ بی جے پی امیدوار اور سابق میئر ستیا کونڈل بھی انتخاب ہار گئی ہیں۔

واضح رہے کہ میونسپل کارپوریشن شملہ کے 34 وارڈوں کے لیے 2 مئی کو ووٹ ڈالے گئے تھے اور 102 امیدواروں نے اپنی قسمت آزمائی تھی۔ ہماچل پردیش کے وزیر اعلیٰ سکھوندر سنگھ سکھو نے میونسپل کارپوریشن شملہ کے انتخاب میں زبردست جیت حاصل کرنے پر امیدواروں، کانگریس کارکنان و عہدیداران کے ساتھ ساتھ شملہ کے عوام کو بھی مبارکباد پیش کی ہے۔

شملہ میونسپل کارپوریشن الیکشن میں ڈالے گئے ووٹوں کی آج جب گنتی شروع ہوئی تو شروع سے ہی کانگریس امیدوار بیشتر وارڈوں میں اپنے حریفوں پر سبقت بنائے ہوئے نظر آئے۔ جب مکمل نتیجہ سامنے آیا تو بی جے پی دوہرے ہندسے تک بھی نہیں پہنچ پائی اور کانگریس نے 24 وارڈوں میں جیت حاصل کر لی۔ وارڈ نمبر 3 کیتھو سے کانگریس کی کانتا سیال، وارڈ نمبر 4 اناڈیل سے کانگریس کی ارملا کشیپ، وارڈ نمبر 6 ٹوٹو سے کانگریس کی مونیکا بھاردواج، وارڈ نمبر 7 مجیاٹھ سے کانگریس کی انیتا شرما، وارڈ نمبر 8 بالو گنج سے کانگریس کے دلیپ تھاپا، وارڈ نمبر 9 کچی گھاٹی سے کانگریس کی کرن شرما، وارڈ نمبر 10 ٹوٹی کنڈی سے کانگریس کی اوما کوشل، وارڈ نمبر 11 نابھا سے کانگریس کی سمی نندا، وارڈ نمبر 14 رام بازار سے کانگریس کی سشما کٹھیالا، وارڈ نمبر 15 لووَر بازار سے کانگریس کی امنگ بانگا اور وارڈ نمبر 16 جاکھو سے کانگریس کے اتل گوتم انتخاب جیتے ہیں۔

اسی طرح وارڈ نمبر 17 سے کانگریس کی شینم کٹاریا، وارڈ نمبر 18 انجن گھر سے کانگریس کے انکش ورما، وارڈ نمبر 19 سنجولی چوک سے کانگریس کی ممتا چندیل، وارڈ نمبر 21 لووَر ڈھلی سے کانگریس کی وشاکھا مودی اور وارڈ نمبر 22 شانتی وِہار سے کانگریس کے ونیت شرما، وارڈ نمبر 23 بھٹھاکوفر سے کانگریس کے نریندر ٹھاکر، وارڈ نمبر 24 سانگٹی سے کانگریس کے کلدیپ ٹھاکر، وارڈ نمبر ملیانا سے کانگریس کی شانتا ورما، وارڈ نمبر 28 چھوٹا شملہ سے کانگریس کے سریندر چوہان، وارڈ نمبر 29 وکاس نگر سے کانگریس کی رچنا بھاردواج، وارڈ نمبر 30 کنگنادھار سے کانگریس کے رام رتن شرما، وارڈ نمبر 33 کھلینی سے کانگریس کے چمن پرکاش اور وارڈ نمبر 34 کنلوگ میں کانگریس کے آلوک پٹھانیا انتخاب جیتے ہیں۔