کانگریس چنتن شیویر: راہل گاندھی سمیت 70 لیڈران ٹرین سے جائیں گے ادے پور، 2 کوچ بُک

کانگریس نے سابق پارٹی صدر راہل گاندھی اور پارٹی کے دیگر لیڈروں کے چنتن شیویر میں راجستھان کے ادے پور جانے کے لیے ٹرین کے دو کوچ بُک کرائے ہیں۔ کانگریس کے تقریباً 70 لیڈران تین روزہ چنتن شیویر میں حصہ لینے کے لیے دہلی سے ادے پور ٹرین سے جائیں گے۔ ذرائع کے مطابق کانگریس نے اس کے لیے ایک ٹرین کے دو ڈبے بک کیے ہیں۔

کانگریس پارٹی نے وزارت ریل سے الگ بوگی کے لیے رابطہ کیا تھا۔ دیگر لیڈروں کے ساتھ راہل گاندھی بھی جمعرات، 12 مئی کو دہلی کے نظام الدین ریلوے اسٹیشن سے ادے پور کے لیے میواڑ ایکسپریس ٹرین سے سفر کریں گے۔ جانکاری کے مطابق رات بھر کا سفر ہونے کے سبب راہل گاندھی نے ٹرین سے سفر کرنے کا فیصلہ کیا ہے۔ تقریباً 744 کلومیٹر کے اس سفر میں 12 گھنٹے 20 منٹ کا وقت لگے گا۔ اس دوران ٹرین 16 اسٹیشنوں پر رکتے ہوئے اودے پور پہنچے گی۔

ذرائع کے مطابق راہل گاندھی نے پیر کی شام کانگریس ہیڈکوارٹر میں منعقد کانگریس ورکنگ کمیٹی (سی ڈبلیو سی) کی میٹنگ میں اس ٹرین سے ادے پور جانے کا فیصلہ پارٹی کے دیگر لیڈروں سے شیئر کیا۔ حالانکہ راہل گاندھی نے یہ پارٹی لیڈروں پر چھوڑ دیا کہ وہ چنتن شیویر میں حصہ لینے کے لیے وہاں کیسے جائیں گے۔ ذرائع کا کہنا ہے کہ سابق مرکزی وزیر جئے رام رمیش اور وویک بنسل جیسے سینئر لیڈروں سمیت 70 سے زائد لیڈر ٹرین سے ادے پور جائیں گے۔ حالانکہ کانگریس جنرل سکریٹری اور چیف ترجمان رندیپ سنگھ سرجے والا اس ٹرین سے سفر نہیں کریں گے۔ ٹرین سے سفر کرنے کا یہ منصوبہ صدر رام ناتھ کووند کے ذریعہ ٹرین سے کانپور کے سفر کرنے کے کچھ وقت بعد کانگریس پارٹی کی طرف سے طے کیا گیا ہے۔

واضح رہے کہ کانگریس سیاسی، معاشی اور تنظیمی محاذ پر مستقبل کی پالیسی تیار کرنے کے لیے ادے پور میں تین روزہ چنتن شیویر منعقد کر رہی ہے۔ یہ پارٹی کی طرف سے منعقد کیا جا رہا ہے اب تک کا چوتھا چنتن شیویر ہے۔ اس شیویر (کیمپ) میں پارٹی کے کل 422 لیڈران حصہ لیں گے۔