چراغ پاسوان نے پھر دکھائے تیور، یو پی اسمبلی انتخاب تنہا لڑنے کا اعلان

اتر پردیش اسمبلی انتخاب میں اب لوک جن شکتی پارٹی کی بھی انٹری ہو گئی ہے۔ چراغ پاسوان نے اعلان کیا ہے کہ ان کی پارٹی ایل جے پی اتر پردیش میں سبھی اسمبلی سیٹوں پر اپنے امیدوار اتارے گی۔ چراغ پاسوان نے اپنے تیور ایک بار پھر سخت کر لیے ہیں اور این ڈی اے سے الگ ہو کر انتخابی میدان میں اترنے کا فیصلہ سنا دیا ہے۔ انھوں نے کہا کہ ’’ہم اتر پردیش اسمبلی انتخاب میں کسی بھی پارٹی سے کوئی اتحاد نہیں کریں گے۔‘‘

لوک جن شکتی پارٹی کی طرف سے اس بارے میں ایک ٹوئٹ بھی کیا گیا ہے جس میں کہا گیا ہے کہ ’’کل اتر پردیش انتخاب کو لے کر ہوئی میٹنگ میں ایل جے پی (آر) یو پی کے ریاستی صدر، مجلس عاملہ رکن، ضلع صدر و کارکنان نے اپنے اپنے مشورے رکھے۔ ان مشوروں کے مدنظر ایل جے پی (آر) مرکزی قیادت میں آئندہ اتر پردیش انتخابات میں تنہا لڑنے کا فیصلہ لیا گیا ہے۔‘‘

واضح رہے کہ اتر پردیش اسمبلی انتخاب آئندہ سال ہونے والا ہے۔ اس تعلق سے سبھی پارٹیاں پوری طرح سرگرم ہو چکی ہیں۔ چھوٹی بڑی سبھی پارٹیوں نے اپنی زمین مضبوط کرنا بھی شروع کر دیا ہے۔ اب ایل جے پی کے انتخابی میدان میں انٹری سے سیاسی ماحول تھوڑا گرم ضرور ہو گیا ہے۔ قابل ذکر ہے کہ ایل جے پی رکن پارلیمنٹ چراغ پاسوان نے یو پی میں انتخاب لڑنے کا اشارہ پہلے ہی دے دیا تھا۔ انھوں نے یو پی اسمبلی انتخاب کو لے کر کہا تھا کہ پارٹی ہر پنچایت، ہر بوتھ پر تیاری کر رہی ہے۔ انھوں نے یہ بھی کہا تھا کہ ہم چاہیں گے کہ مستقبل میں ہم اپنی موجودگی درج کروائیں اور انتخاب لڑیں۔