چھتیس گڑھ: وزیر داخلہ نے بھوپیش سے فون پر بیجاپور حملے کی تفصیلات حاصل کیں

رائے پور: وزیر داخلہ امت شاہ نے آج وزیر اعلی بھوپش بگھیل سے فون پر گZشتہ روز ہوئے بیجا پور ماؤ نوازوں کے حملے کے بارے میں معلومات حاصل کیں اور ریاستی حکومت کو مرکز کی جانب سے ہر قسم کی مدد کی یقین دہانی کرائی۔ سرکاری ذرائع نے بتایا کہ وزیر داخلہ امت شاہ نے بگھیل کو فون کرکے ان سے بیجاپور میں ماؤ نوازوں کے واقعے کے بارے میں معلومات حاصل کیں۔

بھوپیش بگھیل نے وزیر داخلہ کو بیجا پور میں ریاست اور مرکز کے حفاظتی دستوں اور ماؤ نوازوں کے مابین تصادم کی میدانی صورتحال سے واقف کرایا۔ انہوں نے فوجیوں کی شہادت پر افسوس کا اظہار کرتے ہوئے کہا کہ سلامتی افواج کے حوصلے بلند ہیں اور ماؤ نواز تشدد کے خلاف یہ لڑائی ہم جیتیں گے۔

امت شاہ نے وزیر اعلی کو بتایا کہ مرکزی حکومت اور ریاستی حکومت مل کر یہ لڑائی جیتیں گے۔ انہوں نے کہا کہ مرکزی حکومت کی طرف سے جو بھی ضروری مدد ہوگی وہ ریاستی حکومت کو دی جائے گی۔ انہوں نے سی آر پی ایف کے ڈائریکٹر جنرل کو جائے واقعہ کا دورہ کرنے کی ہدایت بھی کی۔

بھوپیش بگھیل نے کہا کہ ماؤ نواز تشدد سے متاثرہ علاقوں میں جاری ترقیاتی کام سے گاؤں کے لوگوں کا ماؤ نوازوں کی جانب رجحان ختم ہو رہا ہے اور وہ مسلسل ترقی کے مرکزی دھارے میں شامل ہو رہے ہیں۔ صحت، تعلیم اور دیگر سہولیات اندرونی گاؤں تک قابل رسائی بن رہی ہیں اور ماؤ نواز نظریے سے لوگ دور ہو رہے ہیں۔ جس سے بوکھلاکر ماؤ نواز اس طرح کے حملے کرکے اپنی موجودگی درج کرانے کی کوشش کر رہے ہیں۔