مویشی اسمگلنگ کیس: 14 دنوں کے لیے عدالتی حراست میں بھیجے گئے انوبرت منڈل

مویشی اسمگلنگ کے ایک معاملے میں سی بی آئی کی خصوصی عدالت نے ترنمول کانگریس لیڈر انوبرت منڈل کو 14 دنوں کے لیے جیل بھیج دیا ہے۔ اس معاملے میں ان کی سی بی آئی کی حراست آج ختم ہو رہی تھی۔ انوبرت منڈل گزشتہ 14 دنوں میں سی بی آئی کی حراست میں تھے اور آج انھیں کولکاتا واقع سی بی آئی ہیڈکوارٹر سے آسنسول لایا گیا تھا جہاں ان کی پیشی ہوئی۔

قابل ذکر ہے کہ سی بی آئی نے مغربی بنگال میں پیر کے روز بیربھوم ضلع کے بولپور واقع ایک چاول مل پر چھاپہ ماری بھی کی تھی۔ یہ چاول مل مبینہ طور پر ٹی ایم سی لیڈر انوبرت منڈل کے قریبی رشتہ دار کا بتایا جا رہا ہے۔ افسران کے مطابق انڈین فوڈ کارپوریشن کے افسران کے ساتھ سی بی آئی کے افسران نے بدھاگورا علاقے میں چاول مل پر چھاپہ ماری کی جو مبینہ طور پر انوبرت کے بھتیجے کی ہے۔ وہ ٹی ایم سی کے مقامی لیڈر بھی ہیں۔

سی بی آئی کے ایک افسر کا کہنا ہے کہ چاول مل اب بند ہے، لیکن ہمارا ماننا ہے کہ جانچ کے عمل کے دوران اس کے اور مویشی اسمگلنگ کے درمیان روابط سامنے آ سکتے ہیں۔ انھوں نے کہا کہ انوبرت منڈل کی مبینہ ملکیت والی کم از کم 11-10 چاول ملیں ہیں جو سی بی آئی جانچ کے دائرے میں ہیں۔ سی بی آئی نے مبینہ طور پر مویشی اسمگلنگ گھوٹالہ کے سلسلے میں ہفتہ کے روز یہاں ایک دیگر چاول مل میں بھی چھاپہ ماری کی تھی۔