انکیتا بھنڈاری قتل معاملہ سے متعلق بی جے پی لیڈر کی آڈیو وائرل، کانگریس نے کہا ’شرمناک سچائی پھر سامنے آئی‘

اتراکھنڈ میں انکیتا بھنڈاری قتل معاملہ ایک بار پھر سرخیوں میں ہے۔ بی جے پی رکن اسمبلی سریش راٹھوڑ کی ایک آڈیو گزشتہ تین چار دنوں سے وائرل ہو رہی ہے۔ کانگریس نے اس آڈیو کو حوالہ بناتے ہوئے بی جے پی کو کٹہرے میں کھڑا کر دیا ہے اور کہا ہے کہ ’’شرمناک سچائی پھر سامنے آ گئی ہے۔‘‘ اتراکھنڈ کانگریس کے صدر گنیش گودیال نے اس معاملے میں دہلی واقع کانگریس ہیڈکوارٹر میں ایک پریس کانفرنس کی۔ انھوں نے میڈیا کے سامنے اپنی بات رکھتے ہوئے انکیتا بھنڈاری کو انصاف دلانے کے لیے احتجاجی مظاہرہ کا عزم بھی ظاہر کیا۔

گنیش گودیال نے میڈیا سے مخاطب ہوتے ہوئے کہا کہ ’’بی جے پی کے سابق رکن اسمبلی سریش راٹھوڑ کی ایک ویڈیو وائرل ہو رہی ہے، جس میں وہ انکیتا بھنڈاری قتل معاملہ سے جڑا انکشاف کر رہے ہیں۔ وہ بتا رہے ہیں کہ انکیتا کا قتل اس لیے ہوا کیونکہ انکیتا کے اوپر دُشینت کمار گوتم کے ساتھ جسمانی رشتہ بنانے کا دباؤ بنایا جا رہا تھا۔‘‘ گنیش واضح کرتے ہیں کہ دُشینت کمار گوتم بی جے پی اتراکھنڈ کے انچارج ہیں۔ پھر وہ کہتے ہیں کہ ’’بیٹیوں کے تئیں بی جے پی لیڈر کیسی نیت رکھتے ہیں، یہ اس بات کی ایک شرمناک سچائی ہے۔‘‘

اپنی بات کو آگے بڑھاتے ہوئے اتراکھنڈ کانگریس صدر نے کہا کہ ’’جب یہ حادثہ پیش آیا تھا، تبھی انکیتا کے کمرے کو بلڈوزر سے توڑا گیا تھا، بستر کو جلانے کی کوشش کی گئی تھی۔ ایسی باتوں سے صاف ہو گیا تھا کہ یہ ثبوتوں کو مٹانے کی سازش تھی۔‘‘ وہ یہ بھی کہتے ہیں کہ ’’دہلی آ کر ہمارا پریس کانفرنس کرنے کا مقصد ہے کہ یہ بات وزیر اعظم نریندر مودی تک پہنچے۔ میری گزارش وزیر اعظم سے ہے کہ وہ اس کیس میں سی بی آئی جانچ کروائیں، تاکہ جو قصوروار ہیں انھیں سخت سے سخت سزا ملے۔‘‘

گنیش گودیال نے وزیر اعظم مودی سے ایک شکایت بھی کی۔ انھوں نے کہا کہ جب بھی وزیر اعظم اتراکھنڈ جاتے ہیں، بڑی بڑی باتیں کرتے ہیں، تب ہم انھیں ان کی ذمہ داریاں یاد دلاتے ہیں۔ ہم نے ہمیشہ وزیر اعظم مودی سے یہی کہا کہ اگر وہ اتراکھنڈ کے لوگوں اور بیٹیوں سے ہمدردی رکھتے ہیں تو انکیتا بھنڈاری معاملے میں شامل لوگوں کو گرفتار کرائیں۔ لیکن بی جے پی حکومت نے پوری طاقت صرف جرائم پیشوں کو بچانے میں لگائی۔ اتنا ہی نہیں، جو ایس آئی ٹی بنائی گئی، اس نے انکیتا بھنڈاری کو انصاف دلانے کی جگہ گواہوں کو دھمکایا، ثبوتوں کو مٹانے والوں کو بچایا۔

اتراکھنڈ کانگریس کے صدر نے انکیتا بھنڈاری معاملہ پر حکومت کی لاپروائی پر اپنی شدید ناراضگی ظاہر کی۔ انھوں نے کہا کہ حکومت جلد از جلد انکیتا بھنڈاری کیس میں سپریم کورٹ کے جج کی نگرانی میں سی بی آئی جانچ کروائے۔ انھوں نے یہ تنبیہ بھی دی کہ اگر اتراکھنڈ حکومت آئندہ 12-10 دنوں میں سی بی آئی جانچ نہیں کرواتی ہے تو ہم انکیتا کو انصاف دلانے اور اس معاملے میں سی بی آئی جانچ کا مطالبہ کرتے ہوئے عظیم الشان احتجاجی مظاہرہ کریں گے۔