بی جے پی کے غنڈوں نے پولس کی ملی بھگت سے سسودیا کی رہائش گاہ پر کیا حملہ: عآپ

دہلی کے نائب وزیر اعلیٰ منیش سسودیا کی رہائش کے باہر مظاہرہ کرتے ہوئے کچھ لوگ ان کے گھر میں گھس گئے۔ جمعرات کو پیش آئے اس واقعہ کے تعلق سے عآپ لیڈروں نے الزام عائد کیا ہے کہ مظاہرین دراصل بی جے پی کے غنڈے تھے جو نائب وزیر اعلیٰ کی فیملی کو نقصان پہنچانے کے ارادہ سے گھر میں گھسے۔ اس الزام کے بعد دہلی پولس نے فوری کارروائی کرتے ہوئے چھ لوگوں کو گرفتار کر لیا ہے۔ پولس کا کہنا ہے کہ عآپ کا الزام ہے کہ بی جے پی کارکنان منیش سسودیا کے گھر کے باہر مظاہرہ کرتے ہوئے ان کے گھر کے اندر داخل ہو گئے۔ اس سلسلے میں فوری کارروائی کی گئی۔

اس سے قبل عآپ نے بی جے پی کے کارکنوں پر پولس کی ملی بھگت سے منیش سسودیا کی رہائش گاہ پر حملہ کرنے کا الزام عائد کیا۔ عآپ ترجمان آتشی مارلینا نے جمعرات کو بتایا کہ ’’آج پولس کی ملی بھگت سے نائب وزیر اعلی کے گھر پر حملہ کیا گیا ہے۔ ایسا واقعہ دہلی کی سیاسی تاریخ میں کبھی نہیں ہوا۔‘‘ انہوں نے سوال کیا کہ ’’کیا مرکزی وزیر داخلہ امت شاہ نائب وزیر اعلی کے اہل خانہ کو مروانا چاہتے ہیں۔ کیا بی جے پی دہلی اسمبلی انتخابات میں نقصان کا بدلہ لے رہی ہے؟‘‘

علاوہ ازیں عآپ لیڈر سورو بھاردواج نے کہا کہ دہلی کے وزیر اعلی کو نظربند کرنے کے بعد وزیر داخلہ امت شاہ کی سرپرستی میں نائب وزیر اعلی کے گھر پر ان کی غیر موجودگی میں بی جے پی کے غنڈوں نے حملہ کیا۔ دہلی پولس نے بی جے پی کے غنڈوں کی حملہ کرنے میں مدد کی ہے۔