سبھی انتخابات ایک ساتھ کرانے والا بل آئین اور وفاقی نظام کے خلاف: پرینکا گاندھی

کانگریس جنرل سکریٹری پرینکا گاندھی واڈرا نے منگل کے روز الزام عائد کیا کہ لوک سبھا اور اسمبلی انتخابات ایک ساتھ کرانے کا راستہ ہموار کرنے والا بل آئین اور وفاقی نظام کے خلاف ہے۔ انھوں نے پارلیمنٹ احاطہ میں نامہ نگاروں سے بات کرتے ہوئے کہا کہ ’’یہ آئین مخالف بل ہے۔ یہ ہمارے ملک کے وفاقی نظام کے خلاف ہے۔ ہم اس کی مخالفت کر رہے ہیں۔‘‘

قابل ذکر ہے کہ حکومت نے ملک میں لوک سبھا اور اسمبلی انتخاب ایک ساتھ کرانے کی سہولت والا بل لوک سبھا میں پیش کیا۔ اس بل کو اپوزیشن پارٹیوں کی شدید مخالفت کا سامنا کرنا پڑا۔ اس بل کو لوک سبھا میں پیش کیے جانے کی مخالفت کانگریس، ترنمول کانگریس، سماجوادی پارٹی، شیوسینا یو بی ٹی سمیت کئی اپوزیشن پارٹیوں کے لیڈران نے کی۔ اس کے باوجود بل لوک سبھا میں پیش کیا گیا اور جب ووٹنگ ہوئی تو اس کی حمایت میں 269 ووٹ پڑے، جبکہ اس کے خلاف 198 لوک سبھا اراکین نے ووٹ دیے۔