گیان واپی کیس میں بڑے فیصلہ کا دن

اتر پردیش کے وارانسی میں واقع گیان واپی مسجد سے متعلق کئی مقدمات عدالتوں میں چل رہے ہیں۔ ان میں سے ایک کا تعلق گیان واپی کمپلیکس میں واقع دیوی شرنگر گوری کی پوجا سے ہے۔ اس وقت انجمن انتظامیہ مسجد کمیٹی احاطے کی دیکھ بھال کر رہی ہے۔ حال ہی میں وارانسی عدالت کے حکم پر احاطے کا سروے کیا گیا تھا۔ پانچ خواتین درخواست گزار، لکشمی دیوی، راکھی سنگھ، سیتا ساہو، منجو ویاس اور ریکھا پاٹھک کی درخواست پر ٹرائل کورٹ نے گیان واپی کمپلیکس کے سروے کا حکم دیا تھا۔ راکھی سنگھ پانچ درخواست گزاروں میں کیس کی قیادت کر رہی ہیں۔

سروے میں ایک شیولنگ کے پائے جانے کا دعویٰ کیا گیا تھا۔ درخواست گزاروں میں سے ایک لکشمی دیوی کے شوہر ڈاکٹر سوہن لال آریہ نے 1996 میں گیان واپی کے حوالے سے مقدمہ دائر کیا تھا۔ سروے میں احاطے کی ویڈیو گرافی اور فوٹو گرافی کے ذریعے شواہد اکٹھے کیے گئے۔ عدالت نے سروے کے لیے ایڈووکیٹ کمشنر مقرر کیے تھے۔ عدالت کے دو کمشنر اجے مشرا اور وشال سنگھ نے الگ الگ سروے کیا تھا اور عدالت میں رپورٹیں پیش کی تھیں۔

کورٹ کمشنر اجے مشرا نے 6-7 مئی کو گیانواپی کیمپس کا سروے کیا تھا۔ اس کی رپورٹ میں دیوتاؤں کی پینٹنگز، کچھ کمل کے نوادرات اور شیش ناگ جیسی شخصیات کا احاطے کی دیوار پر ذکر کیا گیا تھا۔ رپورٹ میں تہہ خانہ کھولنے کا ذکر نہیں کیا گیا۔ کورٹ کمشنر وشال سنگھ نے گیان واپی کیمپس کا 14 سے 16 مئی تک سروے کیا تھا۔ وشال سنگھ کی رپورٹ میں اس بات کا ذکر کیا گیا ہے کہ احاطے کے اندر شیولنگ پایا گیا تھا۔ اس کے علاوہ رپورٹ میں سناتن ثقافت سے متعلق سراغ ملنے کی بات کی گئی تھی۔ رپورٹ میں بتایا گیا کہ احاطے کے تہہ خانے میں سناتن دھرم کے نشان- کمل، ڈمرو، ترشول وغیرہ ملے ہیں۔

سروے کے بعد سپریم کورٹ نے نچلی عدالت کی کارروائی پر روک نہیں لگائی۔ سپریم کورٹ نے حکم دیا تھا کہ احاطے میں شیولنگ ہونے کا دعویٰ کرنے والی جگہ کو محفوظ رکھا جائے۔ ہندو فریق نے مطالبہ کیا کہ پورے گیان واپی کمپلیکس کو ہندوؤں کے حوالے کیا جائے، بھگوان وشویشور کی باقاعدہ عبادت کے لیے انتظامات کیے جائیں، گیان واپی میں مسلمانوں کا داخلہ بند کیا جائے اور مسجد کے گنبد کو گرانے کا حکم دیا جائے۔

گیان واپی کیمپس میں سروے کا حکم دینے والے سول جج (سینئر ڈویژن) روی کمار دیواکر کا 20 مئی کو بریلی تبادلہ کر دیا گیا تھا۔ روی کمار نے اس جگہ کو سیل کرنے کا حکم دیا تھا جہاں مبینہ شیولنگ واقع ہے۔ گیان واپی مسجد سے متعلق پہلا مقدمہ وارانسی کی عدالت میں 1991 میں دائر کیا گیا تھا۔ عرضی میں گیان واپی میں عبادت کی اجازت مانگی گئی تھی۔ واضح رہے 1991 میں ہی مرکزی حکومت نے عبادت گاہوں کا قانون نافذ کیا تھا۔

اس قانون کا حوالہ دیتے ہوئے مسجد کمیٹی نے سومناتھ ویاس، رام رنگ شرما اور ہری ہر پانڈے کی عرضی کو الہ آباد ہائی کورٹ میں چیلنج کیا۔ 1993 میں ہائی کورٹ نے متنازعہ جگہ پر روک لگا دی تھی اور جوں کا توں برقرار رکھنے کا حکم دیا تھا۔ سپریم کورٹ کے ایک حکم کے بعد، 2019 کو وارانسی کی عدالت میں حکم امتناعی کی درستگی کے بارے میں دوبارہ سماعت ہوئی۔ 18 اگست 2021 کو، راکھی سنگھ، لکشمی دیوی، سیتا شاہو، منجو ویاس اور ریکھا پاٹھک نے گیان واپی کمپلیکس میں شرنگر گوری کی پوجا کرنے کا مطالبہ کرتے ہوئے عدالت میں ایک درخواست دائر کی۔