مہاراشٹر میں بی جے پی کو بڑا جھٹکا، ممبر پارلیمنٹ انمیش پاٹل آج شیوسینا یو بی ٹی میں شامل ہوں گے

مہاراشٹر کی 48 لوک سبھا سیٹیں جیتنے کا دعویٰ کرنے والی بی جے پی کو عین الیکشن سے قبل ہی ریاست میں ایک زوردار جھٹکا لگا ہے۔ جلگاؤں سے اس کے ممبر پارلیمنٹ انمیش پاٹل بی جے پی کو چھوڑنے والے ہیں۔ وہ آج ادھو ٹھاکرے کی موجودگی میں شیوسینا یو بی ٹی میں شمولیت اختیار کریں گے۔ یہ اطلاع شیوسینا یو بی ٹی کے ممبر آف پارلیمنٹ اور ترجمان سنجے راؤت نے دی ہے۔

سنجے راوت نے سوشل میڈیا پلیٹ فارم ’ایکس‘ پر لکھا ہے کہ ’’جلگاؤں کے موجودہ ایم پی انمیش پاٹل اور پارولا کے سابق میئر کرن پوار آج ماتوشری میں شیوسینا سربراہ ادھو ٹھاکرے کی موجودگی میں شیوسینا خاندان میں داخل ہو رہے ہیں۔ وہ دوپہر 12 بجے شیوسینا (یو بی ٹی) میں شامل ہوں گے۔‘‘

خبروں کے مطابق بی جے پی ممبر پارلیمنٹ انمیش پاٹل اپنا ٹکٹ منسوخ ہونے سے ناراض تھے۔ پاٹل کل ماتوشری گئے تھے اور ادھو ٹھاکرے سے ملاقات کی تھی۔ اس سے پہلے وہ رکن پارلیمنٹ سنجے راؤت سے بھی ملے تھے۔ بی جے پی نے جلگاؤں سے موجودہ ایم پی انمیش پاٹل کی جگہ سمیتا واگھ کو ٹکٹ دیا ہے۔ کل ادھو ٹھاکرے سے ملاقات کے بعد انمیش پاٹل نے کہا تھا کہ وہ کل اپنے فیصلے کی تفصیل سے وضاحت کریں گے۔ واضح رہے کہ ادھو ٹھاکرے نے ابھی تک جلگاؤں سے کوئی اپنا کوئی امیدوار نہیں اتارا ہے۔ یہ بھی کہا جا رہا ہے کہ ادھو ٹھاکرے انہیں جلگاؤں سے اپنا امیدوار بنا سکتے ہیں۔