عیدالاضحیٰ سے قبل بہار کی نتیش حکومت نے سرکاری ملازمین کو ’تحفہ‘ دینے کا کیا اعلان، 28 جون کو آ جائے گی تنخواہ

عیدالاضحیٰ کا تہوار ہندوستان میں 29 جون یعنی جمعرات کے روز منایا جائے گا۔ مہینہ کا آخر ہونے کی وجہ سے کئی لوگوں کو عید کی خریداری میں پریشانی آ سکتی ہے، اس لیے بہار کی نتیش حکومت نے ایک انتہائی اہم اعلان کیا ہے۔ وزیر اعلیٰ نتیش کمار نے سبھی سرکاری ملازمین اور پنشن حاصل کرنے والوں کو ان کی تنخواہ اور پنشن 28 جون کو ہی دینے کا اعلان کر دیا ہے۔ یعنی بہار کے تقریباً 4 لاکھ سرکاری ملازمین اور 3.5 لاکھ پنشن حاصل کرنے والوں کو عیدالاضحیٰ سے قبل وزیر اعلیٰ نے خاص ’تحفہ‘ دینے کا فیصلہ کیا ہے۔

بہار حکومت کے محکمہ مالیات نے ایک حکم جاری کر گورنر کے پرنسپل سکریٹری، بہار اسمبلی کے سکریٹری، اے جی، پٹنہ ہائی کورٹ، سبھی محکموں کے ایڈیشنل چیف سکریٹری، سبھی محکموں کے پرنسپل سکریٹری، ٹریزری آفس کے ساتھ ہی مقامی کمشنر بہار حکومت کو اس سلسلے میں ہدایت جاری کر دی ہے۔

جاری کردہ ہدایت کے مطابق ریاستی حکومت کے ویسے ملازمین جو گزیٹیڈ اور غیر گزیٹیڈ ہیں، جن کی تنخواہ کی ادائیگی اسٹیبلشمنٹ بل سے کی جاتی ہے، کو متعلقہ ماہ کے آخری کام کے دن پر تنخواہ کی ادائیگی متوقع ہے۔ ایسے سرکاری ملازمین کو عیدالاضحیٰ تہوار کے موقع پر بہار حکومت نے جون 2023 کی تنخواہ ادائیگی 28 جون سے ہی کرنے کا فیصلہ لیا ہے۔ یہ فیصلہ بہار ٹریزری ایکٹ 2011 کے اصول 141 میں موجود التزامات کے مطابق ہے۔

واضح رہے کہ ایسا پہلی بار نہیں ہے جب حکومت بہار نے کسی تہوار کے موقع پر وقت سے پہلے تنخواہ کی ادائیگی کا فیصلہ لیا ہے۔ اس پہلے حکومت نے عید، ہولی، دیوالی اور چھٹھ کے موقع پر بھی اپنے ملازمین کو پیشگی تنخواہ ادائیگی کی ہے۔