بابا صاحب امبیڈکر کے خیالات ہمیشہ ملک کی رہنمائی کرتے رہیں گے: پرینکا گاندھی

بھارت رتن بابا صاحب ڈاکٹر بی آر امبیڈکر کے ’مہاپری نروان دیوس‘ کے موقع پر آج قوم  کی جانب سے انہیں خراج عقیدت پیش کیا گیا اور ان کے دکھائے ہوئے راستے پر چل کر ایک بہتر سماج کی تشکیل کے عزم کا اعادہ کیا گیا۔ اس سلسلے میں کانگریس پارٹی کی جانب سے آنجہانی رہنما کوپُرخلوص خراج عقیدت پیش کی گئی۔

اس دوران کانگریس پارٹی کی سینئر لیڈر اور لوک سبھا رکن پرینکا گاندھی نے بابا صاحب بھیم راؤ امبیڈکر کو بصد خلوص سلام پیش کرتے ہوئے انہیں یاد کیا۔ محترمہ گاندھی نے سوشل میڈیا پلیٹ فارم ’ایکس‘ پرآج صبح اپنی ایک پوسٹ میں کہا کہ ’’ہندوستان کے پہلے وزیر قانون، مشہور وکیل، سیاستداں اور آئین کے معمار بابا صاحب ڈاکٹر بھیم راؤ امبیڈکر جی کے مہا پری نروان دیوس پرانہیں بصد خلوص سلام پیش کرتے ہیں۔‘‘

کانگریس لیڈر پرینکا گاندھی نے اپنی پوسٹ میں مزید لکھا کہ ’’بابا صاحب نے ملک میں آزادی، مساوات، انصاف اور بھائی چارے کے نظریات کو فروغ دیا اور آئین کے ذریعے استحصال زدہ اور محروموں سمیت ہر ہندوستانی کے حقوق کو یقینی بنانے میں اہم کردار ادا کیا۔ باباصاحب کے خیالات ہمیشہ ملک کی رہنمائی کرتے رہیں گے۔‘‘