آرین خان کی ضمانت عرضی پر 26 اکتوبر کو بامبے ہائی کورٹ میں ہوگی سماعت، آرتھر روڈ جیل کی خصوصی سیل میں منتقلی

آرین کو جیل میں عام قیدیوں کا کھانا مل رہا ہے، جبکہ محض چار ہزار روپیہ ماہانہ خرچ کی اجازت ہے جس سے وہ جیل کنٹین سے اپنی ضرورت کی اشیاء خرید سکتے ہیں۔

آرین خان، تصویر آئی اے این ایس
آرین خان، تصویر آئی اے این ایس
user

یو این آئی

ممبئی: بامبے ہائی کورٹ نے جمعرات کو نارکوٹکس کنٹرول بیورو (این سی بی) کے ہاتھوں گرفتار آریان خان کی درخواست ضمانت پر سماعت کے لیے 26 اکتوبر کی تاریخ مقرر کی ہے۔ یہ معاملہ جسٹس این ڈبلیو سمبرے کے سامنے پیش ہوا، جہاں آرین کے وکیل ستیش مانیشندے نے جمعہ یا پیر کو فوری سماعت کی درخواست کی۔ تاہم، جسٹس سمبرے نے اگلے منگل کو اس معاملے کو دیکھنے کا فیصلہ کیا، جس کا مطلب ہے کہ آرین خان کو مزید پانچ دن حراست میں اور گزارنا پڑ سکتا ہے۔

وہیں ممبئی کی خصوصی عدالت کی جانب سے بالی ووڈ کے سپر اسٹار شاہ رخ خان کے بیٹے آرین خان کی منشیات کے معاملے میں داخل کردہ درخواست ضمانت مسترد کیے جانے کے بعد آج صبح اسے آرتھر روڈ جیل کی خصوصی سیل میں منتقل کر دیا گیا ہے۔ 2 اکتوبر کو بحری جہاز میں منشیات کی ریو پارٹی میں شرکت کرنے اور اسے استعمال کرنے کے تعلق سے گرفتار شدہ آرین خان نے دو دن انسداد منشیات سیل (این سی بی) کی تحویل میں گزارے۔


آرین خان کو پانچ اکتوبر سے عدالتی تحویل میں بھیجے جانے کے بعد سے آج تک وہ آرتھر روڈ جیل کے عام قیدیوں کے کمرے میں مقید ہیں۔ ابتدائی ایام میں انہیں جیل کے کورنٹائن مرکز پر رکھا گیا تھا اور پھر ان کی کورونا رپورٹ منفی آنے کے بعد انہیں عام قیدیوں کے کمرے میں منتقل کر دیا گیا تھا، جہاں انڈین ٹوائلیٹ (ہندوستانی طرز کی بیت الخلاء) ہے اور اس کا دروازہ نہیں ہے نیز نہانے کے لئے اسے خود سے برتن میں پانی بھر کر لانا پڑتا ہے اور غسل خانہ بھی کھلی جگہ پر ہے۔

آرین کو جیل میں عام قیدیوں کا کھانا مل رہا ہے جس میں دال، چاول، روٹی اور سبزیاں شامل ہیں جبکہ محض چار ہزار روپیہ ماہانہ خرچ کی اجازت ہے جس سے وہ جیل کنٹین سے بسکٹ، تیل، صابن اور اپنی ضرورت کی اشیاء خرید سکتے ہیں۔ آج صبح اسے جیل کے خصوصی سیل میں منتقل کرنے بعد اس کی سیکورٹی بڑھا دی گئی ہے اور اسے چوبیس گھنٹہ پولیس کی نگرانی میں رکھا جا رہا ہے۔


آرین نے خصوصی عدالت کی جانب سے ضمانت مسترد کئے جانے کے بعد ہائی کورٹ میں چیلنج کیا ہے جس کی آج ابتدائی سماعت عمل میں آئی اور اس کے بعد عدالت نے ضروری احکامات صادر کر کے اس کی سماعت ملتوی کردی۔ اپنے بیٹے سے ملنے کے لئے شاہ رخ خاں کے جیل پہنچنے کی خبر آنے کے بعد ممبئی پولیس نے جیل کے باہر سیکورٹی بڑھا دی ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔