وزارت ریل کے افسران 2 شفٹ میں کام کریں گے، نئے وزیر ریل اشونی ویشنو کا فیصلہ

وزیر اعظم نریندر مودی کی نئی کابینہ میں وزیر ریل کا عہدہ سنبھالنے کے کچھ گھنٹے بعد ہی اشونی ویشنونے اپنی ٹیم کے سبھی افسران کو دو شفٹ میں کام کرنے کی ہدایت دے دی ہے۔

وزیر ریل اشونی ویشنو
وزیر ریل اشونی ویشنو
user

قومی آوازبیورو

وزیر اعظم نریندر مودی کی نئی کابینہ میں وزیر ریل کی ذمہ داری سنبھالنے والے اشونی ویشنو نے فوری طور پر اپنی ٹیم کے سبھی افسران کو 2 شفٹ میں کام کرنے کی ہدایت دے دی ہے۔ جمعرات کی شب جاری ایک آفیشیل نوٹ میں وزارت ریل نے ہدایت دی ہے کہ پہلی شفٹ صبح 7 بجے شروع ہوگی اور شام 4 بجے ختم ہوگی، جب کہ دوسری شفٹ دوپہر 3 بجے سے شروع ہوگی اور 12 بجے رات کو ختم ہوگی۔

وزارت ریل کے ترجمان ڈی جے نارائن نے کہا کہ یہ حکم صرف ایم آر (وزیر ریل) سیل کے لیے جاری کیا گیا ہے نہ کہ نجی یا ریلوے ملازمین کے لیے۔ نارائن نے کہا کہ وزیر ریل نے ہدایت دی ہے کہ منسٹری آفس کے سبھی دفاتر اور ملازمین دو شفٹ میں کام کریں گے۔ انھوں نے مزید کہا کہ ’’یہ صرف ایم آر سیل میں افسران کے لیے جیسا کہ نوٹ میں لکھا ہے۔ بہت کچھ کرنا ہے اور مشن موڈ پر ریلوے کے لیے ہر منٹ معنی رکھتا ہے۔ یم آر سیل کا مطلب منسٹری آفس ہے۔‘‘


واضح رہے کہ سابق آئی اے ایس افسر اشونی ویشنو کو بدھ کے روز وزارت ریل، مواصلات اور الیکٹرانکس کے ساتھ ساتھ انفارمیشن ٹیکنالوجی وزارت کی بھی ذمہ داری دی گئی۔ انھوں نے جمعرات کی صبح ان وزارتوں کا چارج سنبھالا۔ اس سے قبل پیوش گویل وزارت ریل کی ذمہ داری سنبھال رہے تھے۔ کابینہ کی نئی توسیع میں گویل کو کامرس اور صنعت، صارفین امور، فوڈ اینڈ پبلک ڈسٹریبیوشن و کپڑا وزارت کی ذمہ داری دی گئی ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔