’اس بار بی جے پی کا جھوٹ پر مبنی جہاز یوپی میں نہیں اتر پائے گا‘، اکھلیش کا طنز

اکھلیش یادو نے منگل کے روز لکھنؤ میں کہا کہ لوگ کولکاتا سے لکھنؤ پہنچ رہے ہیں لیکن بی جے پی کے لوگ خراب موسم بتا کر دہلی سے یوپی نہیں آ سکے۔

تصویر ٹوئٹر @samajwadiparty
تصویر ٹوئٹر @samajwadiparty
user

قومی آوازبیورو

اتر پردیش میں اسمبلی انتخاب کو لے کر سیاسی پارٹیوں کے درمیان ایک دوسرے پر نشانہ سادھنے کا سلسلہ جاری ہے۔ خراب موسم کے سبب وزیر اعظم مودی کی یوپی کے بجنور میں ریلی کینسل ہونے کے معاملے پر سماجوادی پارٹی سربراہ اور اتحاد کے وزیر اعلیٰ چہرہ اکھلیش یادو نے بی جے پی پر حملہ کیا ہے۔ اکھلیش نے منگل کو لکھنؤ میں کہا کہ لوگ کولکاتا سے لکھنؤ پہنچ رہے ہیں، لیکن بی جے پی کے لوگ خراب موسم بتا کر دہلی سے یوپی نہیں آ سکے۔ انھوں نے مزید کہا کہ اس بار اتر پردیش میں بی جے پی کا جھوٹ کا جہاز نہیں اتر پائے گا۔

واضح رہے کہ مغربی بنگال کی وزیر اعلیٰ ممتا بنرجی سماجوادی پارٹی کے حق میں تشہیر کرنے لکھنؤ آئی ہیں۔ اسی دوران ممتا بنرجی کے ساتھ میڈیا سے بات چیت کے دوران اکھلیش نے بی جے پی کو تنقید کا نشانہ بناتے ہوئے کہا کہ ’’بی جے پی نے اپنی پوری طاقت مغربی بنگال میں لگا دی، لیکن وہ ممتا دیدی کو ہرا نہیں پائے۔ وہ کولکاتا سے لکھنؤ آئی ہیں، لیکن بی جے پی کے لوگ خراب موسم بتا کر دہلی سے یوپی نہیں آ سکے۔ اس بار بی جے پی کا جھوٹ کا جہاز یوپی میں نہیں اتر پائے گا۔‘‘


اس درمیان ممتا بنرجی نے بی جے پی پر حملہ کرتے ہوئے کہا کہ ہاتھرس کا واقعہ، اناؤ کا واقعہ اور کووڈ کے دوران اتر پردیش میں گنگا میں پھینکی گئی لاشوں کے لیے ذمہ دار لوگوں کو تاریخ کبھی معاف نہیں کرے گی۔ انھوں نے یوپی کے وزیر اعلیٰ سے سوال کیا کہ ’’یوگی جی، جب یہ ہو رہا تھا تو آپ کہاں تھے؟ یوگی جی کو اتر پردیش کے عوام سے معافی مانگنی چاہیے۔‘‘

ممتا بنرجی نے اس درمیان اعلان کیا کہ وہ 3 مارچ کو وارانسی جائیں گی۔ ممتا نے سماجوادی پارٹی کے حق میں تشہیر کرتے ہوئے کہا کہ میں آپ سبھی سے سماجوادی پارٹی کی حمایت کرنے اور انھیں جیت دلانے اور بی جے پی کو شکست دینے کی گزارش کرتی ہوں۔ بی جے پی کے ذریعہ کیے گئے جھوٹے وعدوں کے جھانسے میں نہ آئیں۔ پریس کانفرنس کے آخر میں مغربی بنگال کی وزیر اعلیٰ ممتا بنرجی نے اسٹیج سے لوگوں کی طرف ایک فٹ بال بھی پھینکا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔