نوٹ بندی کے 2 سال: کانگریس نے نریندر مودی سے پوچھے 6 سوال

نوٹ بندی کے دو سال مکمل ہو چکے ہیں اور اس کے ذریعہ جن مقاصد کو حاصل کرنے کی کوشش کی گئی تھی، اس کا دور دور تک کوئی پتہ نہیں۔ اس نوٹ بندی کی وجہ سے کچھ مثبت تو نہیں ہوا، لیکن ملک کی معاشی حالت بری طرح خراب ضرور ہو گئی۔ چھوٹی اور متوسط صنعتیں یا تو بند ہو گئیں، یا پھر وہ گھسٹ گھسٹ کر چل رہی ہیں۔ اب جب کہ نوٹ بندی کے 2 سال مکمل ہو گئے ہیں تو کانگریس نے وزیر اعظم نریندر مودی سے 6 سوال کیے ہیں جو اس طرح ہیں:

1. بی جے پی کی آمدنی 80 فیصد بڑھ گئی ہے، لیکن اس کے علاوہ نوٹ بندی سے کس کو فائدہ ہوا؟

2. کالے دھن کے نام پر نوٹ بندی کی گئی اور اب جب کہ 99.3 فیصد پرانے نوٹ آر بی آئی کے پاس لوٹ چکے ہیں، تو کالا دھن آخر کہاں ہے؟

3. مودی حکومت کے غیر ذمہ دارانہ فیصلے سے لاکھوں فیملی کی زندگی بھر کی کمائی برباد ہو گئی۔ ان فیملی سے آپ کیا کہیں گے؟

4. نوٹ بندی کی تباہی سے باہر نکلنے کے لیے ہندوستانی معیشت اب بھی جدوجہد کر رہی ہے۔ آپ آر بی آئی کی خود مختاری کو کم کرنے پر زور کیوں دے رہے ہیں؟

5. بدعنوانی ختم کرنے سے لے کر دہشت گردی کے خلاف لڑنے تک، نظام میں ٹیکس زیادہ سے زیادہ شامل کرنے سے لے کر کیش لیس معیشت بنانے تک، سارے مقاصد ناکام رہے۔ نوٹ بندی کا اصل مقصد کیا تھا؟

6. تقریباً 100 لوگوں کی جان چلی گئی، جی ڈی پی 1.5 فیصد نیچے چلی گئی، تقریباً 3.5 ملین لوگوں نے ملازمتیں گنوا دیں اور غیر منظم سیکٹر برباد ہو گیا۔ پی ایم مودی ہندوستان کے لوگوں سے اس پر معافی مانگنے کی ہمت کب کریں گے؟